DILI, 25 Juñu 2024 (TATOLI) – Sentru Dezenvolvimentu ba Demonstrasaun no Treinamentu Pekuária Dotik, iha Manufahi, hasoru problema tanba fini fahi 25 ne’ebé haki’ak atu distribui ba grupu sira mate, tanba afeta husi peste suína afrikana.
Diretór-Jerál Pekuária no Veterinária, Carlos António Amaral, informa katak balada haki’ak iha sentru ne’e mate, tanba vírus ne’ebé afeta ba fahi komunidade nian da’et to’o sentru ne’e.
Responsavel ne’e haktuir katak tanba fahi komunidade nian ne’ebé mate ne’e la hakoi ho di’ak, maibé so’e arbiru de’it, entaun iha Juñu kuaze udan maka’as no halo bee sulin tama to’o iha sentru hodi hamosu lalar barak no ikus mai afeta ba fahi sira ne’ebé sentru haki’ak ne’e komesa hatudu sintoma vírus ASF no husi fahi 70 ne’ebé hakiak iha sentru, 25 mak mate ona.
“Ita orienta ona ekipa téknika sira ne’ebé serbisu iha sentru ne’e hodi kontinua fase nafatin fahi luhan atu prevene vírus ASF no fahi sira ne’ebé sei moris ne’e, diresaun orienta mós atu ekipa sira dada mós rede metan iha luhan sira atu lalar labele tama no tuur iha hahán ne’ebé fahi sira han”, diretór ne’e dehan ba Tatoli iha Comoro, foin lalais ne’e.
Husi asaun prevensaun ne’ebé ekipa sira halo daudaun ne’e, kuaze fahi hamutuk 45 ne’ebé sei moris ne’e iha nafatin kondisaun di’ak no espera vírus ne’e sei la afeta ba animál sira ne’e.
Tuir kálkulu ne’ebé halo ba fahi 25 ne’ebé mate, Diresaun Pekuária lakon osan pur volta $12.500, tanba fahi sira ne’ebé sentru haki’ak ne’e boot hotu ona no kada fahi nia presu ne’e bele to’o $500.
Xefe Sentru Dezenvolvimentu Demonstrasaun no Treinamentu Pekuária Dotik, Almério Marques, realsa katak sira halo ona prevensaun ba fahi sira ne’ebé sei moris hodi hala’o atividade rotina iha dadeer, meiu dia no loraik fase fahi luhan, nune’e bele prevene virus ASF.
“Tanba fahi sira ne’ebé mate iha komunidade ne’e maka ninia implikasaun da’et fali mai to’o iha sentru Dotik ne’e, liuhusi lalar inklui husi udan ne’ebé lori bee tama mai to’o iha sentru nia laran. Maibé ho serbisu maka’as ekipa sentru nian konsege normaliza ona bee sira halai tuir bee dalan no bee sira ne’e mós agora maran hotu ona”, esplika.
Notísia relevante: Vírus ASF hamate fahi 461 iha Manufahi
Jornalista: Tomé Amado
Editora: Maria Auxiliadora
