DILI, 23 Jullu 2024 (TATOLI) – Komisaun B iha Parlamentu Nasionál (PN), ne’ebé trata Asuntu Defeza, Seguransa no Negósiu Estranjeiru, rekomenda ba Governu atu prepara lojístika ba serbisu operasaun konjunta “Pombu Mutin” hodi garante seguransa ba vizita Papa Francisco iha Setembru ne’e.
Prezidente Komisaun B, deputadu Domingos Agusto ‘Deker’, dehan operasaun konjuntu ne’ebé formaliza ona husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) mak sei garante seguransa ida hakmatek iha vizita Papa nian, entre loron 09 no 11 Setembru.
“Komisaun B nia prezensa hodi partisipa enkontru hamutuk ho superiór sira husi instituisaun defeza no seguransa ne’e atu rona sira-nia preparasaun ba vizita Papa nian. Husi informasaun ne’ebé ita simu buat hotu la’o kapa’as tebes no garante seguransa ida sei hakmatek”, Domingos Deker hateten iha Kuartél Jerál PNTL, Caicoli, ohin.
Deputadu ne’e solisita mós ba PNTL no F-FDTL atu serbisu ho rigorozu no tenke halo vijilánsia ida maka’as iha terrenu, nune’e bele reforsa rekomendasaun sira ne’ebé komisaun B sei husu ba Governu.
Ministru Interiór, Francisco da Costa Guterres, dehan enkontru ho Komisaun B ne’e atu relata preparasaun husi instituisaun rua nian relasiona ho vizita Papa Francsico no komisaun solisista ba forsa seguransa sira atu serbisu ho di’ak iha terrenu.
“Komisaun husu ba Governu atu tau-matan ba lojístika no asuntu administrativu nian. Tanba ne’e, parte defeza no seguransa garante ona ba Estadu katak buat hotu sei la’o di’ak. Servisu konjuntu ne’ebé formaliza ona sei asegura buat hotu iha períodu vizita Papa nian”, nia garante.
Komisaun B husu populasaun koopera ho parte seguransa
Prezidente Komisaun B, Domingos Agusto ‘Deker’, husu ba timoroan hotu tenke kolabora ho PNTL no F-FDTL iha ámbitu vizita Papa, nune’e lori situasaun hakmatek iha país.
Domingos Deker dehan nia parte simu ona informasaun balun katak iha ona grupu organizadu sira sei halo asaun solidariedade ba Papua no Palestina, iha vizita Papa nian, tanba ne’e nia apela ba sidadaun hotu atu mantein estabilidade hodi lori susesu ba eventu ida ne’e no sujere atu halo asaun iha momentu seluk.
“Ita la tolera asaun solidariedade ida ne’e atu akontese, tanba ita-nia relasaun bilaterál ho nasaun viziña Indonézia la’o di’ak. Ha’u hanoin maluk sira iha direitu, maibé di’ak liu koloka ba tempu seluk”, nia reitera.
Tuir nia, sidadaun hotu iha de’it obrigasaun atu serbisu hamutuk ho PNTL no F-FDTL hodi mantein seguransa iha rai-laran hodi hein atu simu Papa Francisco iha nasaun ida ne’e ho haksolok.
Nia afirma katak ba sidadaun ka grupu sira ne’ebé tenta halo duni sira-nia atividade ruma ne’ebé la tama iha ajenda vizita Papa nian, servisu operasaun konjunta iha direitu no obrigasaun atu halo atuasaun hodi hapara atividade sira ne’ebé konsidera perturba orden públika.
Notísia relevante: PNTL no F-FDTL sei foti medida hasoru manifestante iha vizita Papa Francisco
Jornalista: Tomé Amado
Editora: Maria Auxiliadora
