BAUCAU, 24 jullu 2024 (TATOLI) – Idoza ida ho inisiál FM idade-76 hetan asidente, monu husi rai-lolon ho distánsia besik metru 100 no lakon vida.
Idoza ne’e nu’udar komunidade ida iha aldeia Gugulai, suku Uaitame, postu administrativu Quelicai, Munisípiu Baucau.
Kronolojia, tuir Pontu Vokál Autoridade Protesaun Sívil (APC) postu administrativu Quelicai, Manuel Pereira, idoza inisiál FM idade-76 ne’e hetan asidente bainhira la’o-ain atu ba bee-matan nune’e hetan asidente monu husi rai-lolon hodi rezulta lakon vida tanba ho kondisaun grave, iha loron-14 jullu.
“Vítima ne’e monu mate fatin kedas, nia ruin tohar no grave iha ulun,” Pontu Vokál APC postu Quelicai hateten liuhusi Telemovél ba TATOLI, kuarta ne’e.
Distánsia entre Uma vítima ho bee-matan purvolta kilometru tolu nune’e obrigadu tenki la’o-ain tanba nesesidade hodi asesu bee-moos ba konsome no haris.
Manuel Pereira, esplika, vítima suspeitada monu mesak tanba sama kois iha rai-lolon no oan feto hamutuk ho Autoridade suku inklui família buka tuir no ikus hetan ho kondisaun mate iha lokál asidente.
Tuirmai, família hamutuk ho Autoridade Suku evakua no deside laiha autopsia tanba suspeitada asidente singulár nune’e halo prosesu funebre tuir kultura Timor.
Jornalista : Natalino Belo
Editór : Rafael Ximenes de A. Belo
