Reabilitasaun estrada husi rotunda Comoro ba Tasi-Tolu atinje ona 75%
DILI, 25 jullu 2024 (TATOLI)–Supervizór Empreza Montana Diak Unipesoál, Lda, Domingos Pereira, hateten reabilitasaun estrada husi rotunda Estátua Prezidente Repúblika Nicolau Lobato iha Comoro ba to’o Tasi-Tolu ne’e atinje ona 75%.
Serbisu reabilitasaun estrada ne’e, daudaun ne’e empreza nahe ona pavimentu sorin no fui ona alkatraun iha estrada sorin, tanba preparasaun teste ba estrada no alkatraun halo hotu ona husi Governu no Ajensia Dezenvolvimentu Nasionál (AND).
“Ami-nia persentajen serbisu ne’e atinje ona 75%. Ami ohin loron ne’e mós atu nahe alkatraun,” Supervizór empreza Montana Di’ak Unipesoál, Lda, Domingos Pereira, hateten ba Agência Tatoli, iha Rotunda Prezidente Nicolau Lobato, Comoro, kinta ne’e.
Serbisu-ne’ebé mak atu taka ka chor dalan tama ba populasaun sira-nia rezidénsia no mós serbisu nahe pavimentu iha tortoar iha estrada sorin-sorin ne’ebé agora la’o daudaun.
Nia garante katak obra reabilitasaun Estrada husi rotunda Estátua Prezidente Repúblika Nicolau Lobato, Comoro, ba to’o Tasi-Tolu ne’e sei konklui iha agostu nia laran.
“Ami halo esforsu atu konklui, molok Amu Papa Francisco mai halo vizita atu garante evita rai rahun,” nia dehan.
Jornalista : Jesuína Xavier
Editór : Cancio Ximenes
