OÉ-CUSSE, 29 jullu 2024 (TATOLI) – Ministériu Edukasaun (ME) apoia formasaun durante loron lima ba profesór-sira kona-bá programa Edukasaun Multi Língua (EMuLi) atu implementa tán eskola 39 iha Rejiaun Administrativa Espesiál Oé-Cusse Ambeno (RAEOA).
Notísia relevante: Programa EMuLi konsege influénsia eskola 66 submete proposta ba ME
Diretora Nasionál Ensinu Báziku husi Ministériu Edukasaun, Estelita Soares, informa, antes Ministériu Edukasaun implementa ona programa EMuLi, iha munisipíu tolu, RAEOA iha rua maibé agora aumenta tán 39, Manatuto iha eskola rua no Lautem iha eskola 11.
“Programa ne’e, objetivu atu reforsa estudante sira-nia abilidade koñesimentu ba literasia ho númerasia, profesór sira mak tenke haforsa iha eskola, no na’in ba implementadór mós ita-boot sira, ohin Ministériu Edukasaun lori formasaun ne’e mai Oé-Cusse, depois ida-ne’e, profesór-sira mak kontinua haforsa implementa iha idak-idak nia eskola,” Estelita Soares, ko’alia iha abertura formasaun iha otel Ambeno.
Dirijente Ensinu Báziku ne’e, fó hanoin formasaun loron lima, hahú segunda sei termina iha sesta semana ne’e, bele tulun tebes manorin sira atu aumenta koñesimentu, molok fila ba idak-idak nia eskola hodi transmite ba alunu sira.
Notísia relevante: ME esforsa atu hadi’a kualidade edukasaun liuhusi programa EMuLi
Diretór Serbisu Edukasaun Oé-Cusse, Vincencio Cono, orgullu, tanba importante ba estudante aprende uluk, husi ninia lian materna rasik, maibé la’ós atu hanorin lian materna iha eskola, atu introdús lian dahuluk, hodi hatene lian daruak no hakat ba lian datoluk hanesan lian ofisiál.
“Programa EMuLi ne’e, atu eduka kedas labarik sira, iha númerasia no literasia hahú kedas husi baze, liuliu iha pré-eskolár, foka liu ba profesór primeiru anu, primeiru siklu ensinu báziku,” nia hateten.
Tuir nia, intesaun husi EMuLi ne’e, katak, estudante nia mai ho mamuk, mezmu kakutak iha hanoin barak, maibé bainhira tama iha metodolojia edukasaun formál, profesór sira iha klase primeiru-anu pré-eskolár, sira mak dezeña hodi dezenvolve hahú husi tilun hodi rona, matan atu haree, ulun to’o halo nia ibun bele ko’alia literasia no númerasia.
Notísia relevante: Programa EMuLi transforma estudante komprende língua ofisiál Tetun-Portugés
Entretantu, formasaun loron lima ne’e hahú iha segunda sei termina iha sesta semana ne’e, ho formandu sira husi koordenadór Eskola Bázika Filiál (EBF) 41, profesór implementadór na’in-41, inspetór eskolá na’in-hitu (7) no mentór Apoia Lideránsa Mentoria Aprendizajen (ALMA) na’in-hitu.
Jornalista: Abílio Elo Nini
Editór: Evaristo Soares Martins
