iklan

EDUKASAUN, HEADLINE, MUNISÍPIU, OÉ-CUSSE (RAEOA)

ME esforsa atu hadi’a kualidade edukasaun liuhusi programa EMuLi

ME esforsa atu hadi’a kualidade edukasaun liuhusi programa EMuLi

Ministra Edukasaun, Dulce de Jesus, vizita eskola EBF Boboloa observa programa EMuLi. Imajen mídia Sekretáriu Rejionál Edukasaun.

OÉ-CUSSE, 14 juñu 2024 (TATOLI) – Ministra Edukasaun Dulce de Jesus Soare, hateten, Programa Edukasaun Multi Língua (EMuLi), nu’udar meiu ida atu transforma estudante sira atu komprende kona-bá lian ofisiál tétun no portugés, tanba labarik barak ladún hatene tétun no portugés.

“Esforsu ne’ebé ministériu halo, primeiru reforsa literasia no numerasia báziku ba estudante sira atu  hadi’a kualidade edukasaun liuhusi kria programa EMuLi, ida-ne’e mak esforsa, ita tenki reforsa tán,” Ministra Edukasaun ne’e, informa hafoin hala’o vizita estudante programa EMuli sira iha EBC Boboloa Oé-Cusse, sesta ne’e.

Governante ne’e, konfirma Konstituisaun RDTL no Lei Baze Edukasaun garante, katak sidadaun hotu iha direitu hanesan atu simu edukasaun ho kualidade, tanba iha konstituisaun ártigu 13, hateten Estadu Timor-Leste iha devér atu prezerva no dezenvolve lian nasionál Timor-Leste.

Notísia relevante: Ministériu Edukasaun lansa programa ALMA iha Oé-Cusse

Embaxadora Boa-Vontade ba Edukasaun, Kristy Sword Gusmão, agradese ba komunidade sira, tanba agora rekoñese ona susesu ne’ebé eskola EMuLi sira rejista ona, no bao in sei implementa mós iha eskola seluk.

“Ha’u ho ekipa EMuLi sei serbisu maka’as hodi ita bo’ot sira-nia oan bele hetan serbisu oi-oin husi programa ne’e,” nia promete.

Nune’e nia agradese ba Governu Austrália liuhusi Depertment of Foreign Affairs and Trade (DFAT) no Partnership Human Development (PHD), ne’ebé apoia ho finasiamentu ba programa EMuLi ne’e, maibé importante katak, labele haluha, EMuLi ne’e programa Ministeriu Edukasaun la’os ema rai liur nian.

“Saida mak literasia numerasia no saida mak metodolojia hanorin ne’ebé modernu, dezde 2012, implementa Programa EMuLi, ha’u rasik harii iha mumentu ne’ebá, ha’u hanoin atu ajuda labarik ki’ik sira atu aprende lee no hakerek ho sira-nia lian dahuluk,” nia relembra.

Nia esplika, programa EMuLi, atu uza labarik sira-nia lian dahuluk iha prosesu aprendizajén importante tebes tanba lian ida-ne’e mak, lian ne’ebé labarik sira hatene di’akliu-tán ba lian sira seluk, sira espresa sira-nia an, liuhusi lian ida-ne’e.

Labarik sira bele hatudu sira-nia kultura, identidade liuhusi lian ida-ne’e iha sala laran, no iha ona esperiénsia iha Timor-Leste no iha nasaun barak, katak bainhira labarik sira aprende uluk atu lee no hakerek, ho lian dahuluk ida-ne’e sei ajuda sira atu aprende lalais liu tetun no lian protugés.

Sekretária Rejionál ba Asuntu Edukasaun no Solidaiedade Sosiál, Inácia Tamele, agradese ba Ministériu Edukasaun bele implementa programa EMuLi tanba iha Oé-Cusse alvu ona ba eskola tolu.

“Programa EMuLi atu hanorin uza lian materna iha prosesu aprendizajén atu halo introdusaun ba siénsia sira, tanba estudante kuandu domina lian dahuluk fasíl atu aprende lian sira seluk, hodi bele hasa’e sira-nia koñesimentu iha literásia no númerasia, ida agradese tanba Oé-Cusse eskola tolu mak implementa ona, hein katak ba oin bele espanda tán” nia orgullu.

Notísia relevante: Programa EMuLi transforma estudante komprende língua ofisiál Tetun-Portugés

Entretantu, Programa Edukasaun Multi Lingua, daudaun implementa ona iha munisipíu tolu, Lautem no Manatuto, inklui RAEOA, eskola tolu mak alvu ba programa ne’e.

Hanesan, Eskola Bázika Filiál (EBF) 28 Agostu  no Ensinu Pré-Eskolár (EPE) Nossa Senhora Dorosario Numbei lokaliza iha suku Costa, no EBF Boboloa lokaliza iha suku Bobokase perténsia sub-rejiaun Pante Makasar.

Jornalista: Abílio Elo Nini

Editór: Evaristo Soares Martins  

iklan
iklan

Leave a Reply

iklan
error: Content is protected !!