iklan

EDUKASAUN

Programa EMuLi transforma estudante komprende língua ofisiál Tetun-Portugés

Programa EMuLi transforma estudante komprende língua ofisiál Tetun-Portugés

Prezidente Repúblika, Jose Ramos Horta hamutuk ho Ministra Edukasaun, Dulce de Jesus Soares halo abertura sensibilizasaun kona-bá programa Edukasaun Multi-Lîngua ba profesór eskola ensinu báziku no eskola Pre-eskolár iha salaun Ian Martin INFORDEPE, Balide, kinta (18 abríl 2024). Imajen/Tatoli Egas Cristóvão.

DILI, 18 abríl 2024 (TATOLI)—Ministériu Edukasaun, kinta ne´e, halo abertura sensibilizasaun programa Edukasaun Multi Língua (EMuLi) ba profesór eskola ensinu báziku no eskola Pre-Eskolár hosi munisípiu Lautém, Manatuto no RAEOA, iha salaun Ian Martin, Balide, Dili.

Ministra Edukasaun (ME), Dulce de Jesus, hatete, pontu importante iha programa Edukasaun Multi Língua (EMuLi), ne’e mak oinsá transforma estudante sira atu komprende língua ofisiál Tetun no Portugés, tanba estudante sira iha área rurál lahatene ko’alia tetún no portugés.

“Pontu importante mak bainhira tuir estudu iha mundu hatudu katak, labarik ida aprende bainhira nia la hatene lian ida-ne’ebé nia aprende, karik nia iha lian inan mak tenke hatuur fundasaun di’ak liu ba nia, liu-liu literásia no numerásia antes nia hakat ba segundu ka terseira língua. Ho ida-ne’e mak konsidera iha ita-nia rai, iha estudante barak liu-liu iha área rurál, balun sira la ko’alia tetún, la ko’alia portugés. Ita ajuda liuhusi literásia ho numerásia iha sira-nia lian inan, depois halo progresaun hakat neineik tuir programa, tuir planu atu sira hakat ba tinan tuir mai ba iha língua ofisiál sira. Ne’e mak ita iha programa EMuLi ne’e atu ajuda sira,” Governante ne´e hateten hafoin halo abertura ba sensibilizasaun programa EMuLi, ba munisípiu Lautém, Manatuto, no RAEOA, iha salaun Ian Martin, Balide, Dili, kinta ne’e.

Rezultadu husi programa EMuLi ne’e iha prosesu di’ak tebes tanba estudante sira bainhira hakat ba klase normál nia dezempeñu di’ak.

Rezultadu hatudu katak estudante sira-ne’ebé hotu iha programa EMuLi ne’e bainhira hakat ba klase normál sira-ne’e, sira-nia dezempeñu di’ak tebe-tebes nomós estudante balun husi eskola EMuLi ba iha eskola CAFE sira-nia dezempeñu di’ak tebe-tebes. Entaun evidénsia hatudu katak programa EMuLi ne’e iha progresu di’ak tebes,” nia dehan,

Ohin, Ministériu Edukasaun halo sensibilizasaun liuliu ba munisípiu Lautém, Manatuto no Rejiaun Administrativa Espesiál Oé-Cusse Ambeno (RAEOA) ne’ebé mak hala’o programa EMuLi, tanba prosesu ne’e la’o hela, nune’e mós ME hetan ona proposta atu halo espansaun maibé presiza iha planu di’ak tebes antes deside ida-ne’e.

Programa EMuLi nu’udar programa importante ida iha Ministériu Edukasaun, ne’ebé hahú implementa iha 2012 sai hanesan programa pilotu ida.

“Uza métodu sira-neʼebé rekoñesidu internasionalmente kona-ba hanorin lian dahuluk la ofisiál nu’udar instrumentu efetivu atu permite oportunidade ba susesu labarik sira-ne’ebé la domina lian ofisiál ida bainhira tama ba sistema edukativu,” nia hateten.

Embaixadora Boa Vontade ba Edukasaun, Kristy Sword Gusmão, hateten Edukasaun Multi Língua (EMuLi) mak reforsa no hametin identidade kulturál Timor-Leste (TL) nian.

“Edukasaun multi lingua importante tebes tanba hanesan meiu ida hodi reforsa no hametin Timor-Leste nia identidade kulturál ne’ebé úniku iha mundu,” Sword Gusmão liuhosi Vídeo Zoom, kinta ne’e.

Sword Gusmão hateten, to’o ohin loron programa EMuLi boot tebes-tebes iha luta naruk ba edukasaun ba ema hotu-hotu iha rai doben ida-ne’e.

“Buat ida-ne’ebé motiva ha’u no ekipa edukadór sira, halo programa direta edukasaun multi lingua ne’e, iha tinan 23 resin liubá, sai paixaun boot ida ba inkluzivu no igualdade iha asesu Edukasaun. Katak, sistema edukasaun la husik ema ida iha kotuk tanba ne’e iha sosíu ekonómiku ba lian ne’ebé ita ko’alia iha uma,” nia dehan.

Nu’udar inan ida no nu’udar Embaixadora Boa Vontade ba Edukasaun, ne’ebé simu pose hosi Prezidente Repúblika, José Ramos Horta, motiva Ministériu Edukasaun atu espansa tan munisípiu seluk.

“Edukasaun kualidade sai preokupasaun boot ida mai ha’u, soké observasaun durante ne’e vizita ba eskola sira. Iha nia konteúdu hateten katak labarik rihun ba rihun la konsege aprende lian instituisaun iha sala laran. Ida-ne’e mak realidade iha área rurál sira maibé la’ós de’it iha ne’ebá, tuir sensu 2015 nian hatudu katak 70% hosi labarik sira-ne’ebé tama iha primeiru siklu ensinu báziku, la ko’alia tetún nu’udar sira-nia lian dahuluk,” Kristy Sword dehan.

Maibé, Edukasaun iha nasaun barak ne´e fatór lian instituisaun dala barak la hetan atensaun másimu, hosi ukun-na’in no autoridade edukasaun sira

“Tanba ne’e, taxa abandona eskola no repetisaun klase no estudante iha difikuldade iha prosesu aprendizajen no iha mós ligasaun ho problema seluk hanesan merenda eskolár la adekuadu no má nutrisaun, inan ho oan otas kiik, distánsia dook hosi uma ba eskola no fatór sira seluk.
Eskola 60-resin hosi Munisípiu Lautém, Manatuto no RAEOA, ne’ebé husu atu implementa EMuLi iha sira-nia eskola. Tanba sira haree ho matan rasik katak oinsá labarik sira aprende lian iha uma fiar aan iha sala laran. Brani partisipa ativa atividade sira, espresa sira-nia hanoin hodi bele atinje susesu iha sira-nia aprendizajen,” nia hateten.

ME kompromete atu estende programa EMuLi tanba Governu da-sia garante kualidade edukasaun ba sidadaun hotu-hotu, tanba programa EMuLi laiha afiliasaun partidária tanba misaun edukasaun atu abranje iha resesu ema hotu nian.

Lideransa governasaun ida-ne’e nian, edukasaun sai fatór save ida ba programa EMuLi nia motivasaun, buka fasilidade atu habelar benefísia ba labarik no komunidade barak liután

Mentór lokál iha Munisípiu Manatuto, Felezisma Maria Cristo Rei, hateten tinan ne’e Manatuto espansa tan ba Eskola Bázika Filiál (EBF) Cará no Condar.

“Tinan ne’e ita espansa tan ba eskola EBF rua iha Manatuto nian. Maibé antes ne’e ita implementa uluk ona iha ensinu báziku no Pre-Eskolár iha Rembor, Manatuto nian. Ita-nia alin oan sira-ne’e iha duni progresu ba susesu ba programa ne’e tanba sira lee hatene ona,” nia hateten.

Programa EMULI ne’e labarik barak mak tuur ona iha banku ensinu sekundáriu nian, ne’e hatudu programa ne’e iha nia vantajen boot no konsege dedika labarik aprende lian materna de lian inan ba lian nasionál tetún.

“Ami nafatin esforsu atu hanorin no bainihira ami uza metolojia programa EMuLi, labarik sira bele espresa sira-nia hanoin ho ativu nia fiar an,” nia dehan.

Tuir nia, Konstituisaun RDTL no Lei Baze Edukasaun garante sidadaun hotu-hotu iha diretu hanesan atu simu edukasaun ho kualidade, tanba iha konstituisaun artigu 13 hateten, Estadu Timor-Leste iha dever atu prezerva no dezenvolve lian nasionál Timor-Leste nian.

Programa ida-ne’e rasik hetan apoiu husi Governu Australia liuhusi Parseria ba Dezenvolvimenu Humanu (PHD) hahú kedas iha tinan 2018. PHD fó ona apoiu oioin ba programa EMuLi, inklui halo advokásia, formasaun ba manorin no mentór lokál sira, no monitorizasaun ba suporta pedagójiku nian.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!