DILI, 31 jullu 2024 (TATOLI)–Vise Koordenadór ba preparasaun vizita Papa nian hosi igreja no atual pároku Igreja Santo António Motael, Pe. Guilhermino da Silva, informa igreja prepara testu livriñu misa iha lian portugés ba sarani sira iha misa solene ne’ebé sei prezide husi Papa Francisco iha 10 setembru 2024, iha tuku 16h30 lorokraik.
Notísia Relevante: Papa prezide misa iha lian Portugés-orasaun universál lee iha dialeitu 6
Preparasaun testu livriñu ne’e ho objetivu atu fasilita sarani sira iha misa solene ho dalen portugés durante selebrasaun misa ne’e la’o.
“Komisaun prepara testu livriñu iha lian portugés. Testu misa nian ne’ebé atual liu ona no ida-ne’e mak ita sei uza,” Pe. Guilhermino da Silva hateten ba Agência Tatoli, iha Balide.
Tuir padre, preparasaun testu livriñu ne’e ba sarani sira no mós ba padre selebrante sira iha misa Tasi-Tolu nian.
Padre esplika, igreja hakarak prodús testu livriñu ne’e ba ema sarani hotu-hotu maibé depende ba iha kapasidade finanseira igreja nian.
“Tanba ema barak loos, entaun tuir planu igreja nian ne’e sei prodú de’it livriñu 5.000 hanesan ne’e, tuir forsa ne’ebé ita iha,” nia dehan.
Igreja prodús de’it mak testu misál de’it ba sarani sira hodi akompaña misa, la inklui testu múzika, tuir rekomendasaun vatikanu nian tanba múzika sira-ne’ebé kanta ne’e iha lian Tetun hotu no barak hatene muzika sira-ne’e.
Atu diminui kustu ba emprime ba testu livriñu no poupa papel ka surat-tahan, tanba ida-ne’e konsultasaun liturjia Roma nian rekomenda mai.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
