DILI, 31 jullu 2024 (TATOLI)–Membru koru eleitu husi dioseze Baucau, Dili no Maliana, hamutuk 1.100 ne’ebé tuir planu atu partisipa iha misa solene ne’ebé prezide husi Papa Francisco iha Tasi-Tolu ne’e, daudaun ne’e halo insaiu iha sira-nia parokia no sei hala’o insaiu hamutuk iha Dili, iha fulan-agostu nia klaran.
Notísia Relevante: Membru koru 1.100 partisipa misa solene Papa Francisco prezide iha Tasi-tolu
“Iha fulan-Agustu nia laran ne’e, iha 16 no 24 agostu ne’e, koru husi dioseze Baucau, Dili no Maliana sei halo treinu hamutuk tan,” Kordenadór ba preparasaun vizita Papa nian hosi igreja no atual pároku Igreja Santo Motael, Pe. Guilhermino da Silva, hateten ba Agência Tatoli, iha Balide, kuarta ne’e.
Muzika sira-ne’ebé ekipa koru husi dioseze tolu prepara ne’e iha lian Tetun no sarani sira mós hatene kanta tuir, hodi bele kanta hamutuk no hahí Aman maromak durante selebrasaun misa solene iha Tasi-Tolu.
Knananuk ba liturjia misa solene ne’e hetan ona aprovasaun hosi ekipa liturjia Vatikanu nian hodi bele kanta iha selebrasaun ne’e.
Saserdorte ne’e hateten, koru husi dioseze Baucau no Dili hala’o ona sira-nia insaiu hamutuk iha semana kotuk iha igreja Santo António Motael, Dili.
“Sira halo tiha ona sira-nia insaiu iha sábadu 27 jullu no tuir planu ne’ebé iha. ema besik 1.000 mai iha Motael no sira halo ona sira-nia insaiu,” nia hateten.
Tuir dadus, komisaun igreja nian prepara membru grupu koru iha dioseze Baucau, Dili no Maliana hamutuk 1.100 atu bele kanta iha misa solene refere.
Notísia Relevante: Preparasaun simu Papa: Kada parokia hili ema 70 sai membru koru
Jornalista : Jesuína Xavier
Editór : Cancio Ximenes
