DILI, 06 Agustu 2024 (TATOLI)–Organizasaun Naun Governamental Luta Hamutuk sujere atu iha komemorasaun loron konsulta populár ba da-25 (30 agostu 1999-30 agostu 2024) ne’e, sidadaun hotu-hotu atu partisipa ativamente ba iha prosesu dezenvolvimentu nasionál.
“Ita mós tenke tau matan nafatin ba lala’ok dezenvolvimentu no polítika sira-ne’ebé trasa ona iha polítika ukun na’in sira-nian. Hasee nafatin ho brani ita-nia ukun-na’in sira, labele hein de’it katak sosiedade sivil sei ko’alia. Sidadaun ida-idak tenke hamrik ko’alia ida-ne’e lós no ida ne’ebá la loos. Tenke iha kritika konstrutiva no konsidera nasaun ne’e ha’u-nian no rai ida-ne’e ha’u-nian, ukun ne’e ha’u nian, di’ak ba ha’u-nia oan sira hotu,” Diretór Ezekutivu Luta Hamutuk, José Alves da Costa, hateten ba Agência Tatoli iha Faról.
Nia dehan, ema hotu tenke kontribui hodi labele sai apatizmu tanba ikus-ikus ne’e povu tuur la liga ba lala’ok ukun ne’ebé durante ne’e la’o.
“Halo mós di’ak no la halo mós di’ak. Konforme ukun-na’in sira halo ba, ami-nia tinan lima mai mak ami ba hili ka vota de’it,” nia fó hanoin.
Tuir nia, se sosiedade la akompaña prosesu dezenvolvimentu nasionál no nasaun ne’e monu, ema hotu hetan susar, tanba ne’e tenke ativamente hola parte iha prosesu dezenvolvimentu nasionál ida-ne’e.
“La’ós ita hotu ba ukun, maibé mínimu ita hotu iha ne’ebá atu dezenvolvimentu Estadu no instituisaun Governu fornese ba ita hautur ho lolos no kualidade, atu bele iha sustentabilidade,” nia dehan.
Nia enkoraja populasaun atu labele lakon esperansa, tanba loos duni katak Timor-Leste sei selebra loron konsulta populár ba da-25 iha 30 agostu ne’e, maske balun sei moris iha kotuk hanesan ekonomikamente sei hakdasak.
“Maibé, kontinua iha korajen nafatin, tau fiar ba ukun na’in sira oinsá bele dezenvolve rai ho di’ak tuir ita-nia eroi sira-nia mehi katak libertasaun povu. Ita nu’udar povu no sidadaun baibain, labele lakon esperansa no konfiansa, maibé nafatin iha esperansa no konfiansa ba ukun-na’in sira,” nia dehan.
Nia mós sujere ba ukun-na’in sira tenke prioriza programa sira no avalia saida mak sei falta atu halo no hatene saída mak halo uluk atu bele atinje mehi ida atu liberta povu husi mukit ne’e.
“Libertasaun povu husi ki’ak ne’e tenke ba ema hotu-hotu. Laiha ema ida ita tau ba kotuk, politikamente no ekonomikamente tenke tau prioridade programa sustentabilidade ba nasaun,” nia hateten.
Partisipasaun feto importante iha prosesu dezenvolvimentu
Iha fatin seluk, Prezidente Rede Feto, Zelia Fernandes, apela ba feto sira atu bele kontribui ba iha prosesu dezenvolvimentu nasionál.
Nia esplika, tinan 25 referendu ninian atu restaura independénsia Timor-Leste, tinan ida ne’ebé fó sentidu ida di’ak tebe-tebes ba ema hotu atu refleta fila-fali saida mak halo ona ba iha pregresu nasionál no dezafiu ne’ebé hasoru iha konstrusaun Estadu.
“Husu ba ita-nia inan feto sira atu fó kontribuisaun ba rai ida-ne’e ba ita-nia nasaun ne’ebé sosa ho raan no ruin, ho mós ita-nia feto maluk sira no bebé oan sira mate. Ita-nia partisipasaun ne’e importante, tanba ita-nia kontriusaun projeta ita-nia nesesidade no preokupasaun,” Prezidente Rede Feto, Zelia Fernandes, hateten ba Agência Tatoli, iha Parlamentu Nasionál.
Tuir nia, feto bele organiza nia aan iha vida polítika no ekonómika hodi kontribui ba iha konstrusaun Estadu liuhosi edukasaun no formasaun adekuadu.
Jornalista : Jesuína Xavier
Editór : Cancio Ximenes
