DILI, 06 agostu 2024 (TATOLI)—Deputadu FRETILIN, Antonio Calau, husu atu simu rejistrasaun seguidór relijiaun sira seluk hodi partisipa misa solene iha Tasi-Tolu ne’ebé prezide husi Sua Santidade Amu Papa Francisco, iha 10 setembru 2024, iha tuku 16h30.
Preokupasaun ne’e mosu tanba daudaun ne’e Igreja Katólika liuliu iha parókia sira halo hela rejistrasaun ba sarani sira-ne’ebé atu partisipa iha misa solene ho rekezitu ne’ebé aplikasaun mak sertidaun no kartaun eleitorál.
“Preokupasaun ida mai husi ita-nia maluk sira minória ka sira-ne’ebé la’ós Katólika. Amu Papa Francisco nu’udar figura unidade mundiál fó mós fatin ba ita-nia maluk sira-ne’ebé la’ós Katólika atu partisipa hodi asiste misa ne’ebé sei akontese ka atu hasoru Amu Papa iha tempu balun. Maibé, presiza ka lae, sira ba halo rejistrasaun. Karik sira ba rejista lori dokumentu saida, tanba sira laiha sertidaun,” nia hato’o liuhusi intervensaun iha reuniaun plenária komisaun permanente iha Parlamentu Nasionál, tersa ne’e.
Tanba ne’e, nia husu ba Vise Ministru ba asuntu Parlamentár atu haree preokupasaun ne’e no tau mós konsiderasaun, tanba Amu Papa ne’e reprezenta figura mundiál.
Hatán ba preokupasaun ne’e, Vise Ministru ba asuntu Parlamentár, Adérito Hugo da Costa, agradese ba kontinuasaun akompañamentu ba preparativu sira simu vizita Amu Papa ninian, komisaun organizadora serbisu ho sériu tebes ba preparativu sira iha rai-laran.
Nune’e mós, nia dehan, komisuan organizadora koordena ho nasaun viziñu hanesan Indonézia liuliu provínsia NTT, tanba kestaun ida liga ho vizita Papa nian, sira hanesan nasaun viziñu ne’e RL tenke buka meiu oioin atu fasilita anímu sarani sira-nian la’ós de’it iha nasionál ne’ebé hakarak mai aproveita vizita Papa nian.
Entretantu, tratamentu ba asuntu ne’e liga ho nasaun viziñu nian la’ós fasil komisaun organizadora serbisu ho intensivu tebes ho entidade hotu inklui reprezentante Santa Sé iha Timor-Leste, koordena didi’ak ho aspeitu hotu-hotu no aspeitu seguransa mak sai importante.
Tan ne’e mak rekezitu sira karik públiku akompaña ona iha mídia katak, introdús rekezitu balun ne’e meiu sira-ne’ebé ita halo, komisaun organizadora haree hotu ho kuidadu atu nune’e hanesan uma-na’in ba simu vizita Papa nian bele ho susesu no seguru.
Ida-ne’e la’ós impede ema ruma nia movimentu ka sidadaun sira atu mai hasoru Papa maibé rekezitu mínimu ne’ebé tenke halo no se laiha duni mak sei buka dalan seluk hodi fasilita sira.
Governante ne’e dehan, simu no rejista nafatin lamentasaun no informasaun sira hodi fó hatene ba komisaun organizadora oinsá halo jestaun másimu ba sarani sira hotu ne’ebé hakarak mai aproveita vizita Papa nian mai Timor-Leste.
Jornalista : Nelson de Sousa
Editór : Cancio Ximenes
