DILI, 08 agostu 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’, hateten fortalesimentu kooperasaun militár ho nasaun membru ASEAN importante hodi asegura no garante seguransa iha rejiaun Sudeste Aziátiku.
“Ita-nia pozisaun hotu ne’ebé ita hola iha aspetu militár ka polítika ka ba saida de’it ita tenke ho kuidadu. Ha’u foin sai husi serimónia aniversáriu ASEAN ba dala-57, ha’u konkorda katak ita- nian defeza estratejiku ne’e ASEAN”, Jenerál Falur, hateten ba jornalista sira hafoin hasoru malu ho Organizasaun Naun Governamentál sira iha salaun Komandu Jerál PNTL, Caicoli, kinta, ohin.
Falur akresenta, kooperasaun militár no defeza, hakarak ka lakohi tenke investe liu ba nasaun viziñu Indonézia tanba rai rua ne’e bele prevene ameasa sira ne’ebé mak kontese iha fronteira.
“Ita-nia defeza estratéjika, hakarak ka lakohi ita tenke investe ita-nia kooperasaun sira iha Indonézia”, nia adianta.
Nia haktuir, iha enkontru altu nivél husu ba nasaun bo’ot sira hodi hametin kooperasaun Tmor-Leste nian ho nasaun sira iha ASEAN, atu ASEAN sira di’ak nafatin hodi labele sai fali inimigu ba Timor-Leste.
“Iha enkontru altu nivél ASEAN, ha’u koalia ba ha’u-nia omólogu Xefe Estadu Maiór Jenerál ASEAN nian no iha ha’u-nia enkontru bilaterál ho ha’u-nia omólogu Jenerál TNI reformadu, Yudo Margono, ha’u hateten ba nia katak ita-nia kooperasaun tenke marka diferente iha rejiaun ida-ne’e”, nia konklui.
Jornalista: Natalino Costa
Editór : Zezito Silva
