DILI, 08 agostu 2024 (TATOLI)—Prezidente Konsellu Kombatente Libertasaun Nasionál (KKLN), Vidal de Jesus ‘Reak Leman’, husu ba joven sira atu halo reflesaun ba loron istóriku konsulta populár, ne’ebé tinan ne’e komemora ba dala-XXV (30/08/1999 – 30/08/2024).
“Konsulta populár ne’e mobiliza komunidade hodi halo referendu, ne’ebé ha’u hanoin jerasaun foun tenke halo reflesaun nune’e husu joven sira atu injeta ba futuru no kontribui ba dezenvolvimentu Timor-Leste nian iha futuru ne’ebé prósperu no susesu,” Veteranu ne’e hateten ba Agência Tatoli, iha ninia knaar fatin, Arte Moris, Comoro, kinta ne’e.
Nia dehan, kontribui ba dezenvolvimentu mak tenke serbisu hamutuk hodi kria pás no estabilidade ho Governu no Estadu hodi nune’e bele implementa planu no programa ne’ebé trasa ona.
“Ita presiza dezenvolvimentu ba setór saúde, edukasaun, agrikultura, infranstrutura bázika hanesan estrada, bee-moos, eletrisidade no seluk tan. Ida-ne’e mak bele lori dezenvolvimentu ba futuru ne’ebé di’ak. Tanba konsulta populár halo ema barak mak mate, família fahe malu, halai namkari entre maun-alin, no to’o ohin loron iha balun mak família seidauk hetan nia ruin,” nia akresenta.
Notísia relevante : PN sei realiza sesaun solene komemora loron konsulta populár ba da-25
Reak Leman haktuir, iha momentu ne’ebá (1999) Timor-Leste iha situasaun difísil no terus nia-laran, tanba pro-autonomia sira sempre halo konfrontu no tiru populasaun arbiru inklui estraga sasán.
“Ami reprezentante Falintil sempre tama ho pás no estabilidade iha situasaun ne’e, atu oinsá ita bele halo eleisaun ho di’ak no ikus ita hetan independénsia mak ita tenke hakalma situasaun. Nune’e ita bele atinje ita-nia objetivu katak mate ka moris tenke ukun rasik-an,” nia tenik.
Sentru votasaun ba konsulta populár 30 agostu 1999 hamutuk 200 mak estabelese iha territóriu Timor laran tomak. Ho totál populasaun ne’ebé rejistu atu vota hamutuk 451.792 no husi totál populasaun ne’e iha 98,5% ba mak vota iha sentru votasaun.
Iha fatin ketak, Sekretáriu Estadu ba Veteranu, César da Silva, konsidera loron istóriku ne’e importante tebes tanba liuhosi prosesu naruk ba libertasaun ukun rasik-an.
“Iha momentu ne’ebá desizaun ikus ne’ebé ita-nia povu deside mak destinu no direitu ida-ne’e. Nune’e husu ba ita hotu atu halo reflesaun kle’an ida kona-ba prosesu istória pasadu,” nia hameno.
Ohin loron povu Timor-Leste tomak re-lembra tan ba loron istóriku konsultasaun populár ba dala-XXV hanesan loron ida ne’ebé importante ba timoroan hotu hodi hakotu sira-nia sofrimentu no terus husi okupasaun rejime militár Indonézia.
Jornalista : Osória Marques
Editora : Julia Chatarina
