DILI, 09 agostu 2024 (TATOLI)–Bispu Dioseze Baucau, Dom Leandro Maria Alves, husu ba sarani sira hotu atu partisipa iha misa solene iha Tasi-Tolu iha 10 setembru 2024, tanba vizita pastorál Santu Padre nian nu’udar bensaun ida ba povu timoroan hotu.
Notísia Relevante: Papa Francisco sei prezide misa solene iha Tasi-Tolu iha 10 setembru
“Iha oportunidade ida ne’e mos atu fó hanoin ba sarani sira atu mai partisipa hodi manifesta ita-nia fiar no simu bensaun husi amu Papa, no mós hatudu ita nia fiar ba amu Papa ne’ebé lori bensaun ba ita,” Bispu Dioseze Baucau, Dom Leandro Maria Alves, hateten ba jornalista sira hafoin hala’o enkontru entre Governu ho Igreja hodi ko’alia kona-ba progresu preparasaun ba vizita amu Papa Francisco nian, iha Motael.
Bispu Baucau ne’e hateten, bele iha akontesimentu bara-barak iha sosiedade nia le’et maibé importante liu mak prepara aan hasoru no simu bensaun hosi amu Papa Francisco.
Ekipa Governu no Igreja iha serbisu koordenasaun ida-ne’ebé di’ak tebe-tebes ba preparasaun vizita amu Papa ninian.
“Iha enkontru ne’e Governu ho ekipa esplika, ha’u sente kontente tanba iha preparasaun ne’e hatudu entuziasmu husi Governu no igreja mós halo kolaborasaun ida di’ak. Timor-Leste hatudu ninia aan hanesan sarani no Estadu ida-ne’ebé mak sempre kolabora, ne’eduni agradese ba ekipa Governu no igreja ba serbisu preparasaun ida-ne’e,” nia hateten.
Sarani sira labele preokupa ho rejistu iha parokia
Iha fatin hanesan, Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, husu ba sarani sira atu labele preokupa ba rejistu, tanba ida-ne’e atu hatene númeru sarani sira partisipa iha misa.
“Rejistu la’ós limita ema maibé organiza di’ak liután ema hira mak mai husi munisipiu hotu-hotu. Ida-ne’e, atu sukat fatin Tasi-Tolu ba kada munisipiu,” bispu ne’e hateten.
Konaba ba labarik no idade avansadu sira tuir misa, padre Salesianjao ne’e hateten, ba sira-ne’ebé sente saudável bele ba partisipa misa iha Tasi-Tolu, maibé ba sira-ne’ebé iha kondisaun lakonfortavel labele obriga aan, tanba iha momentu ne’eba sei halibur ema barak, kondisasun loron manas no rai-rahun barak.
“Ema ida-idak tenke hatene aan, sé nia moras labele ba tuir misa. Idade avansadu maibé forte, augenta ho kosar no rai-rahun ida-idak responsável, hanesan mós bebe sira no inan-aman sira hatene,” nia dehan.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Jornalista : Jesuína Xavier
Editór : Cancio Ximenes
