OÉ-CUSSE, 09 agostu 2024 (TATOLI) – Sekretaria Rejionál ba Asuntu Saúde, Autoridade Rejiaun Administrativa Espsiál Oé-Cusse Ambeno (RAEOA) realiza, ohin, teste eskrita ba kandidatu funsionáriu saúde hamutuk na’in-144 hodi prienxe ba vaga 58.
Sekretáriu Rejionál ba Asuntu Saúde, Luís de Jesus Neno, hateten rekrutamentu ne’e halo tanba instalasaun saúde sira iha área rurál falta profisionál saúde atu halo atendimentu ba komunidade.
“Iha halo teste hanesan ne’e atu evita problema, karik ita bolu de’it mai tama serbisu, halo diskriminasaun, balun kontente, balun hirus. Di’akliu ita loke konkursu ba ema hotu, ita nakloke hodi bele mai tuir teste, tanba ita mesak timoroan no mesak Oé-Cusse oan. Naran katak nu’udar sidadaun iha direitu atu asesu ba kualker serbisu, maibé tenke liuhusi prosesu legál,” Luís de Jesus Neno ko’alia iha otél Ambeno.
Notísia relevante: SNAEM presiza aumenta rekursu umanu apoia servisu ambulánsia iha Oé-Cusse
Nia dehan, vaga ne’ebé foin daudaun fó sai iha vaga 58, maibé ema ne’ebé hatama dokumentu 300-resin no na’in-144 mak konsege liu selesaun dokumentu hodi partispa iha teste eskrita ne’e.
“Husi 144 ne’e, ita buka 58. Ohin, prienxe ona pergunta sira, responde ho di’ak hetan valór di’ak no posibilidade bele liu ba faze entrevista. Ita laiha família, laiha kór partidu, maibé ba públiku tomak,” nia dehan ba kandidatu sira iha ámbitu teste ne’e.
Notísia relevante: Pesoál saúde iha Oé-Cusse la sufisiente atu koloka ba instalasaun servisu saúde
Diretór Komisaun Funsaun Públika Oé-Cusse, Domingos Punef, realsa vaga ida-ne’e prevista ona iha planu asaun anuál 2024 nian ba Servisu Saúde.
“Funsaun Públika mai atu sai sasin, atu teste la’o tuir lei númeru 8/2004, loron 16 fulan-juñu, artigu 15 kona-ba konkursu públiku internu no termu sertu nian. Espera Sekretáriu Rejionál sira seluk bele banati tuir ida-ne’e, katak presiza funsionáriu tenke liuhusi konkursu públiku”, nia dehan.
Vaga 58 ne’e destina ba médiku, parteira, enfermeira, farmasista, pesoál laboratóriu, saúde públika, finansa no administrasaun.
Diretór Komisaun Funsaun Públika Oé-Cusse informa, daudaun ne’e RAEOA iha totál funsionáriu permanente hamutuk 1.441.
Notísia relevante: RAEOA loke konkursu ba pesoál saúde na’in-58
Jornalista: Abílio Elo Nini
Editora: Evaristo Soares Martins
