OÉ-CUSSE 03 agostu 2023 (TATOLI) – Adjuntu Diretór Servisu Saúde Rejiaun Administrativa Espesiál Oé-Cusse Ambeno (RAEOA), Fugundo Lafo, rekomenda ba Servisu Nasionál Ambulánsia Emerjénsia Médika, Institutu Públiku (SNAEM,IP), hodi aumenta rekursu umanu ba atendimentu servisu ambulánsia iha Oé-Cusse Ambeno.
“Durante trimestre daruak, fulan neen ona ekipa servisu ambulánsia maka’as tebes, tanba hosi janeiru to’o juñu ne’e, servisu ambulánsia transferénsia pasiénte na’in-396 mai hosi fasilidade báziku sira, hanesan postu saúde no sentru saúde no mós kontaktu direita hosi pasiente rasik,” Fugundo Lafo, ko’alia iha ámbitu abertura formasaun matadalan prátika klínika iha Oé-Cusse, kuarta ne’e.
Notísia relevante: SNAEM fahe matadalan prátika klínika ba ekipa ambulánsia Oé-Cusse
Fugundo Lafo, hateten, durante ne’e servisu ambulánsia la’o maka’as tanba hasoru direita pasiénte ho tipu emerjénsia, dalaruma ekipa tempu ba sira-nia la to’o atu hala’o servisu.
Tuir nia, bainhira ekipa servisu ambulánsia halo shiff, dalaruma shiff ne’e laiha tempu ba sira atubele deskansa, hanesan motorista médiku no enfermeira la sufisiente.
“Tanba ne’e, ami espera katak iha futuru aumenta tuir nesesidade ne’ebé maka servisu ambulánsia persiza, haree mós hosi númeru transferénsia pasiénte hosi komunidade no fasilidade sira aumenta, entaun ba oin haree mós parte rekursu umanu, iha RAEOA persiza tebes atu aumenta rekursu umanu, karik bele, ne’e hanesan rekomendasaun, ” nia propoin.
Nia hateten, haree hosi servisu sira-ne’ebé maka ekipa halo, sufisiénte ka la sufisiénte, maibé persiza iha estudu ida kona-bá servisu no mós sira-nia tempu ba espasu ida atu-bele deskansa, tanba ne’e direitu hanesan funsionáriu, ita-nia direitu hanesan, tempu ba sira persiza deskansa.
Tanba servisu ne’e iha risku, bainhira kuandu hala’o servisu ho kalan bo’ot, ho situsaun ne’ebé mak la konfortabél, ita mós sai hanesan kandidatu ida atu hetan dezastre.
“Ita la espera, tanba ne’e persiza haree asuntu liga ho ema nia servisu no tempu ne’ebé nia uza atu hala’o servisu, tan ne’e tenki persiza atu haree asuntu rekursu umanu,” nia katak.
Aliende ida-ne’e, ho SOP ne’ebé maka iha, téknika ho prátika ne’eb’e mak hala’o, ita-bele hadi’a ona, transferénsia sira-ne’ebé durante ne’e halo, ezemplu, dalaruma sentru saúde no postu saúde sira, refere pasiénte la ho dokumentu no laiha informasaun ida kredivél, atu ema ne’e bele transporta no hetan akompañamentu apoia atendimentu emerjénsia.
Xefe Departementu Servisu Ambulánsia Oé-Cusse, Aniceto de Jesus Pereira, informa, totál ekipa servisu ambulánsia daudaun ne’e iha Oé-Cusse hamutuk na’in-10, komposta hosi médiku na’in-ida, enfermeiru no enfermeira na’in-lima no motorista na’in-haat, ho totál sentru saúde lima no postu saúde 19 ne’ebé eziste iha territóriu Oé-Cusse.
Notísia relevante: SNAEM.IP sei hahú jere rasik ninia orsamentu no rekursu umanu
Jornalista: Abílio Elo Nini
Editor: Evaristo Soares Martins
