DILI, 20 Agostu 2024 (TATOLI) – Centro Nacional Chega! (CNC) nia tetu fiskál ba 2025 ho montante $1.363.643, maibé verba ne’e seidauk sufisiente atu realiza programa iha tinan oin maka CNC propoin adisionál $641.734 ba Komité Revizaun Orsamentu (KRO).
Diretór-Ezekutivu CNC, Hugo Maria Fernandes, adianta katak CNC nian orsamentu ne’ebé preve iha Planu Asaun Anuál 2025 nian hamutuk millaun $2,4, maibé ho tetu fiskál ne’ebé CNC simu husi KRO ne’e sei difikulta implementasaun programa sira iha futuru.
“Ami-nia orsamentu ba tinan oin kompara ho tinan ne’e hetan redusaun 24%, kuaze rihun $420-resin. Tanba ne’e, ami mai aprezenta fali proposta adisionál $641.734 ne’e hodi husu ba KRO atu lori filafali CNC ba kondisaun di’ak atu serbisu sira ne’ebé sei halo iha tinan oin bele la’o ho di’ak”, Hugo Fernandes dehan iha Mascarenhas, ohin.
Tuir dirijente ne’e, tetu fiskál ne’ebé KRO fó ba CNC ne’e ba de’it saláriu no vensimentu no bens no servisu, enkuantu ba transferénsia públika, kapitál menór no kapitál no dezenvolvimentu ko’a hotu, tanba ne’e CNE propoin filafali adisionál atu asegura nia planu iha futuru.
Nia esplika katak verba ne’ebé CNC prevee ho montante millaun $2,4 ne’e atu halo prezervasaun istória, tanba CNC iha ona planu atu kontinua apoia muzeu lima hodi trata sira-nia kondisaun. Tanba ne’e, presiza osan ne’ebé sufisiente atu tulun nafatin muzeu sira.
“Daudaun ne’e, ita iha muzeu lima maka tama iha ita nia planu no programa atu kontinua hetan apoiu maka iha Covalima, Viqueque, Aileu, Bobonaro no Manatuto”, informa.
Lembra katak Orsamentu Jerál Estadu 2024 ba CNC hamutuk $1,804,377 no ezekuta ona 53,8%.
Jornalista: Tomé Amado
Editora: Maria Auxiliadora
