Governu-Igreja hatuur ona meza modelu ró iha altar Tasi-Tolu
DILI, 22 agostu 2024 (TATOLI) – Governu liuhusi ekipa tékniku Ajensia Dezenvolvimentu Nasionál (ADN), Ministeriu Administrasaun Estatal no Igreja, kuarta (21 agostu 2024) ne’e, deside hatuur ona meza modelu ró ne’ebé halo husi ai-naa ho nia naruk metru tolu (3), aas metru 1.11 no luan metru 1.10 no ambaun rua ho metru ida (1) ne’e, iha prasa Vatikanu no altar iha Tasi-Tolu.
Notísia Relevante: Igreja prepara meza altar modelu “Ró” ba misa solene iha Tasi-Tolu
Konstrusaun altar no prasa vatikanu iha Tasi-Tolu ne’ebé konstrui husi empreza Karya Timor ho medida diametru 50, altar iha metru 17×35 ne’ebé gasta orsamentu millaun $1 ne’e, hatuur mós objetu relijiozu seluk estátua Nossa Senhora Imaculada Conceição hanesan padrueira Timor-Leste hatuur iha liman karuk altar nian no korpus hatur iha liman looss altar nian ho medida metru 2,5 no hatuur estátua São Miguel Arcanjo, Rafael no Gabriel iha altar nia kotuk.
“Hatuur ambaun no meza altar nian iha altar santu ne’e, amu Papa sei selebra eukaristia ho sarani tomak Timor-Leste nian iha fatin furak no kmanek ne’e,” Diretór Ezekutivu ADN, Rui Lourenço Marçal, hateten ba jornalistas sira iha Tasi-Tolu.
Nia hateten, meza altar ne’e halo husi ai-naa ne’ebé oferese husi sarani sira husi Maubara-Liquiça ba Governu no igreja hodi lori ba karpinteiru sira halo meza.
“Oportunidade ida-ne’e agradese ba sira, tanba fó ona prenda espesiál ba povu Timor-Leste tomak no ita-nia bainaka espesiál Santu Padre ne’ebé sei vizita Timor-Leste,” nia dehan.
Husi preparasaun sira-ne’e, konstrusaun prasa vatikanu no altar santu iha Tasi-Tolu ne’e, ninia progresu atinje ona 90%, tanba agora hela hela buat kiik-oan sira hodi finaliza.
Diretór ne’e mós hateten, estátua Nossa Senora Imaculada Conceição hanesan padrueira ba Timor-Leste no korpus ne’ebé hatuur iha altar ne’e prodús iha Yogyakarta-Indonézia.
“Amu Guilhermino da Silva husi Igreja mak ba observa diretamente hodi halo aprovasaun no apresiasaun,” nia hateten
Tuir planu, nia dehan, prasa Vatikanu no altar santu iha Tasi-Tolu sei hetan bensaun iha semana ne’e nia laran.
Notísia Relevante: MAPPF oferese ai-naa hodi konstrui altar iha Tasi-Tolu
Jornalsita : Jesuína Xavier
Editór : Cancio Ximenes
