Profisionál saúde tenke dixiplina iha serbisu fatin
OÉ-CUSSE, 23 Agostu 2024 (TATOLI) – Sekretáriu Rejionál ba Asuntu Saúde, Luís de Jesus Neno, husu ba profisionál saúde iha sentru saúde Nítibe, iha Baoknana, suku Bene-Ufe, atu fó atendimentu ba komunidade ho domin no tenke dixiplina iha serbisu fatin.
Iha enkontru koordenasaun serbisu ho profisionál saúde sira, Luís Neno, enkoraja médiku sira atu hatudu profisionalidade iha serbisu no trata pasiente ho dignu, tanba sira bá instalasaun saúde tanba sofre moras ruma.
“Komunidade bainhira mai iha ne’e, persiza ita atu konsulta, tenke simu sira ho di’ak, tanba sira iha problema mak mai husu ita-nia tulun. Lei hateten katak sidadaun hotu iha direitu atu hetan tratamentu saúde ne’ebé Estadu Timor-Leste prepara ona”, Luís Neno afirma iha sentru saúde Nítibe.
Notísia relevante: Sekretáriu Saúde Rejionál solusiona problema falta bee-moos iha Postu Saúde Bitila
Dirijente saúde ne’e fó hanoin ba profisionál saúde sira atu kumpre ierarki serbisu, nune’e bele hasa’e indikadór kobertura saúde. “Ko’alia kona-ba dixiplina, nu’udar funsionáriu persiza tama no sai tuir oras. Depois tenke serbisu di’ak atu hasa’e indikadór kobertura ne’ebé Governu sentrál fó mai sentru saúde Baoknana. Ida-ne’e mak importante”, nia fó hanoin.
Notísia relevante: MS halo advokasia kona-ba Programa Malária iha suku Bene-Ufe
Iha biban ne’e, Xefe Sentru Saúde Nítibe, António Fernandes Caet, promote sei kumpre orientasaun, tanba rekursu umanu iha Postu Saúde Nítibe sufisiente atu fó atendimentu ba komunidade.
“Ita laiha problema tanba funsionáriu permanente na’in-22, kontratadu 15 no responsavel ba moras malária na’in-neen, seguransa no cleaner na’in-15 ne’ebé destaka iha sentru saúde Baoknana”, nia dehan.
Notísia relevante: Servisu Saúde Oé-Cusse rejista pasiente TBC 102 no hitu lakon vida
Sentru saúde Nítibe iha postu saúde lima ne’ebé fó atendimentu ba populasaun iha suku lima, Bene-Ufe, Lela-Ufe, Suni-Ufe, Usitakao no suku Ban-Afi no aldeia 17.
Jornalista: Abílio Elo Nini
Editora: Maria Auxiliadora
