DILI, 02 Setembru 2024 (TATOLI) – Ministériu Agrikultura, Pekuária, Peska no Floresta (MAPFF) iha dívida ba viajen estranjeiru hamutuk $41.847, informa ministru tutela Marcos da Cruz.
“Ha’u la komprende, tanba saida maka ministériu tenke iha fali dívida ba viajen estranjeiru? Antes ne’e ha’u dehan ona bainhira atu halo viajen, ita tenke hatene hodi bele halo autorizasaun ba despeza. Bainhira osan iha maka bele autoriza halo viajen”, ministru dehan iha enkontru ne’ebé halo ho dirijente sira iha salaun MAPPF, Comoro, ohin
Governante ne’e lamenta katak ba viajen sira ne’ebé nia aprova ne’e tanba iha duni osan maka autoriza nia rekursu halo viajen bá estranjeiru, maibé ikus mai iha fali dívida ne’e presiza iha esplikasaun.
“Viajen Dili-Johar-Bandung ita iha dívida hamutuk $1.047, depois Dili-Jenebra iha $10.800, nune’e mós Dili-Jakarta iha dívida rihun $7, viajen Dili-Sri Lanka iha dívida $10.000, no Dili-São Paulo, Brazíl, iha dívida $13.000”, nia preokupa.
Governante ne’e salienta katak loloos ne’e ministériu labele iha problema ho dívida ba estranjeiru, tanba prevee ona orsamentu viajen ba pesoál sira. Nune’e, nia sujere atu aselera prosesu pagamentu hodi rezolve lalais iha semana ida ne’e nia laran.
“Iha semana ida ne’e imi tenke rezolve problema dívida ne’ebé ministériu hasoru ho asuntu viajen estranjeiru nian. Ne’e duni, ohin segunda, 02 Setembru 2024, ha’u hakarak segunda oin buat hotu kona-ba dívida ne’e tenke rezolve ona”, nia subliña.
Aleinde iha dívida ba viajen estranjeiru, ministériu mós iha tusan ba sentru Ratahu Viqueque nian, ne’ebé mai husi governasaun anteriór, tanba la selu eletrisidade ho montante rihun $6, tanba ne’e parte EDTL bá tesi tiha fiu iha sentru referidu.
Ministru husu ba Diretór-Jerál Pekuária atu rezolve lalais hodi hakerek karta ba EDTL hodi husu sira bá halo fali instalasaun foun, tanba ministériu prontu ona atu selu dívida iha fulan ida ne’e nia laran.
Jornalista: Tomé Amado
Editora: Maria Auxiliadora
