DILI, 02 setembru 2024 (TATOLI) – Komandante Departamentu Tránzitu Seguransa Rodaviaria Nasionál, Superintendente Asistente Polísia, Luis da Costa, hateten autoridade sira sei taka estrada públiku balun iha Dili, hahú iha sábadu, 7 setembru 2024.
“Ita-nia pontu fokál ne’ébé mak instala iha Forsa Tarefa informa mai Polísia Tránzitu katak dalan balun hirak ne’ebé mak ita sei blokeia permanente, rute ne’ebé maka ita-nia Santo Papa atu bele liu, iha momentu ne’eba, ita sei hamate dalan hirak ne’e. Tanba ne’e hakarak informa ba públiku iha kapitál Dili katak hahú loron 07 fulan-Setembru dalan hirak ne’ebé ita atu hamate ne’e mak iha área Nunsiatura (Motael) ninian, husi Ministériu Turizmu, Embaixada Thailandia, Jardim Motael, kruzamentu Motael sorin, Portu Dili, Postu Colmera no mós iha Hotel Timor nia kotuk”, Superintendente Asistente Polísia, Luis da Costa liuhusi komunikadu ne’ebé TATOLI asesu segunda, ohin.
Superintendente Asistente Polísia ne’e salienta katak dalan protokolu ne’ebé sei blokeia mak área Aeroportu Nicolau Lobato to’o Nunsiatura, husi Rotunda Nicolau Lobato, Sentru Formasaun Polísia, Ponte CPLP, Kruzamentu Timor Plaza, Eskuadra Dom Aleixo, Kuartél Jeneral F-FDTL, Kampu Alor, Postu Flamboyan (Uma Lafatik), tun fali mai Ministériu Turizmu ninian.
“Husu ba komunidade sira ne’ebé iha dalan hirak ne’ebé ohin mensiona, dalaruma labele hetan asesu ba sirkulasaun estrada públiku. Tanba iha loron 09 setembru, dalan balun sei blokeia iha atividade Amo Papa nian husi Nunsiatura ba Palásiu Prezidente liuhusi Portu Dili, Postu Tránzitu Colmera, ida-ne’e ita sei kontra jalur/diresaun ne’e ita sei kontra tanba ita sei direta ba Palásiu Prezidente ninian, dalan sira ne’e ita hamate bainhira ita-nia Sua Santidade Amo Papa liu”, hateten husi komunikadu ne’e.
Komandante ne’e dehan, iha loron 10 fulan-Setembru, ita sei hamate dalan husi Nunsiatura ba Irmã Alma iha Pantai Kelapa hahú husi Ministériu Turizmu, Kampu Alor, MNEC, Embaixada Amérika, Pertamina Pantai Kelapa, IOB dalan hirak ne’e sei hamate.
Husi fatin Irmã Alma atu ba fali Igreja Katedral, ita sei blokeia dalan sira hanesan Katedral, Kruzamentu EDTL, Edifísiu BNCTL Obrigadu Barak, Ministériu Edukasaun no mós iha entrokamentu Tuana-laran nian tanba Amo Papa nia rute husi Irmã Alma ba Katedral. Tanba ne’e dalan sira hanesan husi Timor Plaza nia kotuk no oin, Merkadu Comoro, Eskuadra Dom Aleixo, Kuartél Jeneral F-FDTL, Kampu Alor, Aitarak Laran, Rotunda Tugu Pramuka, mai los fali Colmera, sae ba edifísiu EDTL mak sae ba Katedral, dalan sira ne’e ita sei taka.
“No iha loron 10 fulan Setembru husi Nunsiatura ba Tasi-tolu, dalan ne’ebé ita blokeia ne’e maka dalan protokolu sira ne’ebé ohin ha’u mensiona ne’e hahuú husi Rotunda Tugu Pramuka sae mai los toó Tasi-tolu ne’e ita hamate hotu, nune’e mós hafoin missa husi Tasi-tolu mai Nunsiatura nafatin liu husi dalan protokolu sira ohin ha’u temi”, husi komunikadu ne’e.
Iha 11 fulan-Setembru, Amo Papa sei halo viajen husi Nunsiatura iha Sentru Konvensaun Dili (CCD), entaun estrada ne’ebé sei blokeia mak mak hanesan iha Championes, Caicoli RBC Rumbia, Kruzamentu Balide, Kruzamentu Kintál Boót, entrakamnetu antigun edifísiu Suku Santa Kruz, Kintal Ki’ík no mós entrakamentu Gedung Kebudayaan Indonesia, fatin sira ne’e ita sei hamate hotu.
Dalan husi Nunsiatura ba CCD mak liu husi Nunsiatura, Portu Dili, Palásiu Governu, BCTL, Hidayat, Rotunda Merkadu Lama pois tama iha CCD. No fila fali husi CCD ba Nunsiatura husi Championes, Caicoli, Rotunda Ministériu Justisa, Catedral, Edifísiu Colmera, Postu Tránzitu Kolmera, Portu Dili ba iha Nunsiatura. No husi Nunsiatura ba Airportu husi Nunsiatura, Portu Dili, Postu Tránzitu Kolmera, ETO, Mandarin, Aitarak Laran, Kampu Alor, Kuartél Jeneral F-FDTL, Eskuadra Dom Aleixo, Merkadu Comoro, Timor Plaza, Ponte CPLP, CFP toó Rotunda Nicolau Lobato.
Jornalista: Natalino Costa
Editór : Zezito Silva
