DILI, 04 setembru 2024 (TATOLI)–Prezidente Autoridade Munisipiu (PAM) Dili, Gregorio Saldanha, lakonkorda ekipa konjunta Sekretariu Estadu Asuntu Toponímia no Organizasaun Urbana (SEATOU) hodi halo atuasaun agresivu hasoru vendedór sira iha Kampung Baru-Comoro.
“Ha’u deskorda no kondena aktu violénsia ne’ebé membru ekipa konjunta SEATOU nian halo hasoru vendedór sira. Di’ak-liu ne’e, kria kondisaun ba negosiante sira. Ida-ne’e kritéria bázika. Se ema faan barak, sei iha kresimentu ekonomia,” Prezidente Autoridade Munisipiu Dili, Gregorio Saldanha, hateten ba jornalista sira liuhusi konferénsia imprensa nakait ho atuasaun membru ekipa konjunta SEATOU ne’ebé halo agresaun hasoru vendedór sira iha Comoro, ne’ebé realiza iha Caicoli, kuarta ne’e.
Nia hateten, PAM Dili aprezenta ona planu ba Governu kona-ba alokasaun orsamentu jerál Esatdu ba tinan 2025 hodi hadi’a kondisaun merkadu.
“Pelu menus prepara kondisaun minima merkadu sira hanesan Becora, Manleuana no Taibesi no kondisaun estasionamentu veikulu nian. Iha responsabilidade atu hadi’a kondisaun mínima ba populasaun,” nia dehan.
Nia hateten, se nia deklarasaun ne’e la adekuada ba iha superiór sira, nia parte prontu atu rejigna-aan husi nia pozisaun hanesan Prezidente Autoridade Munisipál Dili.
Loloos, tuir nia, fatin sira-ne’ebé SEATOU hasai ona ema, bele halo kondisaun hodi fó ba ema oinsá kontribuia taxa ba ema.
Iha sorin seluk, Diretór Luta Hamutuk, José Alves da Costa, dehan kondisaun iha merkadu sira labele akumula vendedór hotu-hotu halibur hamutuk iha merkadu ida atu hala’o sira-nia atividade negósiu loro-loron.
“Minimu ita fasilita sira-ne’ebé faan iha dalan ninin sira-ne’e, tanba sente defisil ba moris. Tenke kria kondisaun ba sira. Estadu nia prezensa ne’e atu fasilita no akompaña, la’ós kria SEATOU ba sobu de’it, ne’e morál laiha,” Diretór Luta Hamutuk, José Alves da Costa, hateten ba Agência Tatoli, iha Faról, kuarta ne’e.
Nia esplika, se ba sobu vendedór sira-nia sasán, ema sira-ne’e atu ba han saida no ha iha fatin ne’ebé, Governu ne’e la delek sira ba iha ne’ebá no familia ba iha ne’ebá mós sei sente katak laiha kondisaun.
“Ita ba tau hamutuk iha ne’ebá, bee no saneamentu ladi’ak no iis, loloos ne’e ita hadi’a infraestrutura,” nia hateten,
Aleinde ne’e, nia dehan, presiza kondisaun estasionamentu ba transporte públiku no vendedór no kompradór sira-ne’ebé hakarak ba hola modo.
“Laiha tensaun ruma, maibé obriga ho forsa de’it. Sira viola sidadaun nia direitu. Ha’u hanoin ida-ne’e la justu,” nia hateten.
Loke merkadu sira ho kondisaun iha fatin-fatin, molok muda vendedor sira, la’ós duni uluk ema mak iha planu dezeñu ba merkadu sira.
“Laiha lei ida-ne’ebé hateten sidadaun munisipál labele mai Dili, hatudu to’ok mai,” nia dehan.
Jornalista : Jesuína Xavier
Editór : Cancio Ximenes
