DILI, 09 setembru 2024 (TATOLI)–Sua Santidade Papa Francisco, segunda (09 setembru 2024) lorokraik, tuku 18h00 kalan, ho karreta Toyota marka SIENTA kór abu-abu ho xapa mátrikula SVC 1 hala’o vizita kortezia iha Palásiu Prezidensiál Nicolau Lobato, Bairru Pite, Dili.
Notísia Relevante: Mensajen Papa Francisco hakerek iha livru bainaka Palásiu Prezidensiál
To’o iha resintu Palásiu Prezidensiál, Papa Francisco tun husi karreta ne’e, Papa Francisco tuur iha kadeira rosa ne’ebé ajudante Daniele Cherubini dudu ba oin, ne’ebé simu direta husi Prezidente Repúblika, José Ramos Horta.
“Buat ne’ebé di’ak-liu no furak liu ne’ebé Timor-Leste iha mak ninia ema sira. Ha’u haraik bensaun ba ita-boot ho ha’u nia fuan tomak,” Papa Francisco husik hela mensajen hodi hakerek ho liman iha iha livru bainaka (onra) Palásiu Prezidensiál, iha serimónia vizita kortezia hasoru malu ho Prezidente Repúblika, José Ramos Horta, iha Palásiu Prezidensiál Nicolau Lobato.
Serimónia simu Papa Francisco hahú ho hananu múzika Ino Nasionál Vatikanu nian “Inno e Marcia Pontificante” no múzika Ino Nasionál Timor-Leste “Patria!, Patria!”. Hafoin ne’e, hala’o serimónia parada militár husi membru Falintil-Forsa Defeza Timor-Leste (F-FDTL) ne’ebé hatais uniforme formál hanesan seguransa Vatikanu nian ho faru kór mean no kalsa metan.
Hafoin parada militár ramata, Xefe Estadu Timor-Leste José Ramos Horta, aprezentra Xefe no membru Governu Konstitusionál da-sia (IX) ba Papa Francisco ne’ebé hahú husi Xefe Governu Kay Rala Xanana Gusmão no tuir ekdas membru Governu sira seluk ba Papa Francisco no Papa Francisco mós aprezenta estrutura Vatikanu ne’ebé akompaña Papa ba Prezidente Repúblika José Ramos Horta.
Hafoin ne’e, Prezidente Horta akompaña Papa Francisco tama ba sala enkontru no Papa Francisco ho kadeira roda tuur iha meza ida-nia oin, hodi hahú kaer lapijera hodi hakerek hela mensajen eskrita iha livru bainaka (onra) Palásiu Prezidensiál ho dalen Espanól;
“Agradeço ao Senhor por ter me trazido ao Timor-Leste e encorajo seu povo a viver a alegria da fé em harmonia e diálogo com a cultura. A melhor e mais bela coisa que o Timor-Leste tem é o seu povo. Eu os abençoo de coração.”
Mensajen husi Papa Francisco ne’e tradus ba dalen Tetun nune’e; “Ha’u agradese ba Na’i tanba lori ha’u mai Timor-Leste no ha’u enkoraja ninia povu atu moris ksolok fiar nian iha armonia no diálogu ho kultura. Buat ne’ebé di’ak-liu no furak liu ne’ebé Timor-Leste iha mak ninia ema sira. Ha’u haraik bensaun ba ita-boot ho ha’u nia fuan tomak.”
Papa Francisco hakerek mensajen ida-ne’e, hafoin oras balun Papa Francisco to’o iha Timor-Leste, ne’ebé haree ho matan rasik sarani katólika Timor-Leste rihun ba rihun ho entuziasmu hamriik iha dalan protokolu husi rotunda Prezidente Nicolau Lobato Comoro to’o iha rezidénsia Nunsiatura Apostólika iha Motael, hodi simu ninia prezensa ho haklalak no hakilar “Viva Amu Papa, Viva Amu Papa!”.
Notísia Relevante: Hasoru ho Amu Papa Francisco, Líder Nasionál Lú Olo, Alkatiri no Taur iha ona Palásiu Prezidesiál
Jornalista : Nelson de Sousa
Editór : Cancio Ximenes
