DILI, 10 setembru 2024 (TATOLI)–Labarik Ema ho Defisiénsia (EhD) na’in-tolu (3) iha Asosiasi Lembaga Misionari Awam (ALMA) hanesan Rivaldo da Silva, Micela Araújo no Dulcia Saldanha simu tersu husi sua Santidade Papa Francisco iha nia vizita pastorál ba hasoru madre no labarik sira ALMA, Pantai Kelapa, Dili.
Tersu-ne’e sira-na’in tolu hetan bainhira simu Amu Papa hafoin tar aka kahe tais no fó ai-funan ba Santu Padre, bainhira sua Santidade to’o iha rezidénsia ALMA.
Dulcia Araújo haktuir, oinsá ba tara tais ba Amu Papa, bainhira to’o mai fatin ALMA nian ne’e, nia sente preparadu simu Papa mak liuhusi prosesu preparasaun ba vistuáriu molok simu Papa no hadi’a fuuk hodi sui tiha ka kotuk hanesan konde, hafoin ba tara tais ba Papa.
“Ha’u hetan tersu husi Papa ne’e kontente, Kontente tanba ha’u bele rei Papa nia liman no kadeli ne’e,” Dulcia Saladanha hateten ba Agência Tatoli, iha Pantai Kelapa.
Entretantu, labarik Rivaldo da Silva haktuir katak nia mak ba fó ai-funan ba amu Papa no nia kolega feto na’in-rua mak tara Tais ba Papa.
“Ha’u kontente,” nia dehan ho apresiasaun moe-moe.
Iha fatin hanesan, Micela Araújo hanesan ema ho defisiensia matan ida konta tuir katak ho nia kolega lori tais hodi tara ba amu Papa.
“Sente kontente tara tais. Amu ko’alia ba ha’u, Maromak fó bensaun. No, ha’u rein Papa nia liman,” nia haktuir ba Agência Tatoli.
Joralista : Jesuína Xavier
Editór : Cancio Ximenes
