Salurik bandeira Vatikanu halo Tasi-Tolu sai kinur-mutin

DILI, 10 setembru 2024 (TATOLI)—Falta oras haat Papa Francisco atu prezide misa iha Tasi-Tolu maibé  husi dadeersan to’o oras ne’e, sarani sira husi dioseze Dili,  Baucau no Maliana ne’ebé tuir dadus kuaze 700.000 ne’e nakonu ona Tasi-Tolu.

Husi altar santu ne’ebé konstrui iha parte loromonu nian, iha lagua tasi-tolu nia ninin to’o iha tasi-ibun be estrada nasionál hafahe ne’e mós, laiha fatin ida mak sarani sira husik mamuk mamuk leet de’it.

Notísia Relevante: Ohin Amu Papa to’o TL, Bandeira Vaticano iha Dili: Oinsá nia istória no signifikasaun?

Maske misa solene iha Tasi-Tolu ne’e sei hahú iha tuku 16h30 lorokraik, maibé sarani sira oferese-aan prienxe fatin sira-ne’ebé komisaun organizadora prepara, tuir kada munisípiu ninia fain konsentrasaun ne’e, ema hamriik rabat malu metin be metin.

Antes Xefe Estadu Vatikanu no Líder Katólika Mundiál, sua Santidade Papa Francisco, sama ain iha fatin istóriku Tasi-Tolu, iha loron manas nia okos, saranisira halo sakrifísiu hamriik iha loromatan nia okos hodi helik netik sira-nia ulun ho salurik bandeira Vatikanu, halo rai-luan Tasi-Tolu ne’e hanesan falun hela ho bandeira Vatikanu nian.

“Sorte, horisehik ami simu salurik bandeira Vatikanu nian be, helik netik ami husi loron nia manas. Maske manas, maibé ami la sente kolen tanba ami sente ida-ne’e hanesan grasa ida,” Peregrina husi Parókia Bedois, Josefina Joselita Marques, hateten ba Agência Tatoli iha fatin konsentrasaun sarani Baucau ba misa solene nian iha Tasi-Tolu, tersa ne’e.

Nia haktuir, maske nia ho ninia família sira ba iha Tasi-Tolu ne’e hahú husi tuku 07h00 dadeersan, maibé to’o oras ne’e nia la sente kolen.

Maske ema barak maibé la hamate ninia esperansa atu mantin nafatin iha fatin konsentrasaun ne’ebé sira hamriik ba daudaun ne’e.

Loloos, nia hamrik iha fatin konsentrasaun munisípiu Dili nian, maibé tanba sarani munisípiu Dili barak demais no fatin ne’e nakonu, entaun nia ba hamriik hamutuk falo ho sarani sira husi munisípiu Baucau nia fatin.

Iha fatin konsentrasaun ne’ebé nia hamriik ba ne’e, nia hateten, fatin ne’e sente mamuk uitoan no bele hetan anin malirin nia fresku, maske ema barak hamriik rabat malu.

“Iha fatin ami hamriik ba ne’e, iha leet mamuk uitoan. Ha’u haree ba sorin-sorin ne’e, Tasi-Tolu nakonu ho ema ua’in nia ulun. Pior liután, hateke husi ema nia ulun nia leten, só ita haree hetan de’it mak salurik kór oioin (mean, metan, azul) maibé domina liu mak salurik ho kór bandeira Vatikanu nian. Ha’u haree hanesan bandeira Vatikanu ho medida boot mak nahe no taka hela tasi-Tolu ne’e,” nia dehan hodi halo komprasaun.

Bainhira haree ba ema barak ne’e, nia hateten, maske lori hela bukae ruma husi uma maibé nia haree hetan ema barak ne’e, sente kabun ne’e la hamlaha no la hamrook.

“Ohin dadeer sai husi uma, ami lori kedas hahan no bee-hemu Aqua boot ne’e kada ema ida. Ami hamlaha no hamrook ne’e, tuur iha rai mak han no hemu daudaun. Loron bele manas maibé ami tuur iha fatin ne’e, hanesan ami-nia uma rasik,” nia dehan.

Maske sei iha oras haat resin mak misa solene ne’e hahú, nia dehan, sarani sira-ne’ebé nakonu iha Tasi-Tolu ne’e mantein hodin hein ho domin, to’o sua Santidade Papa Francisco sama ain iha altar Tasi-Tolu ne’e nia leten.

“Loron ida ohin ne’e, loron isóriku. Papa Francisco ne’e mai dala ida hodi vizita Timor-Leste, la’ós mai beibeik. Atu manán grasa ne’e, ami tenke hein,” nia hateten.

Tuir nia, sarani ida-idak hamriik metin iha ida-idak nia fatin, tanba hakat ba oin susar atu hakat no la’o ba kotuk mós susar atu book aan. Satán, atu book aan hakat ba sorin-kuana no sorin-karuk ne’e, sente ain ne’e prega metin hela iha fatin de’it.

“Di’ak-liu hetan ona fatin ne’e, tenke hamriiik metin kedas. Se ita muda kois dala-ida ba fatin seluk, ema seluk mak sei hadau ita-nia fatin. Tanba ne’e, ami tenke hein Papa Francisco iha fatin ne’e, to’o misa solene ne’e ramata mak ami fila-fali ba uma,” nia dehan.

Jornalista : Jesuína Xavier

Editór        : Cancio Ximenes