DILI, 10 de setembru 2024 (TATOLI) – Sarani atus hitu-resin hosi Parókia Sagrado Coração de Jesus Becora hahú preparasaun hodi partisipa misa ne’ebé dirije hosi Papa Francisco iha Tasi Tolu, Dili.
Tuir responsável ba peregrinu Parókia Sagrado Coração de Jesus Becora, João da Silva Pereira, igreja prepara ona transporte hamutuk 19 hodi tula sarani sira bá no mai.
“Há’u hanoin kareta 19 mak sei tula ita nia sarani sira. Kareta 8 hahú tula ona dadaun ona ita-nia peregrinu sira, maibé balun sei tula tan peregrinu sira ba hatun iha Hudi Laran mak la’o tama too Tasi-Tolu”, dehan nia ba Tatoli, iha Becora.
Reponsavel ne’e orgullu tebtebes, ema hothotu hakarak partisipa misa iha Tasi Tolu, tanba Santu Padre nia prejensa hanesan grasa, paz, domin, unidade no amizade ba povu Timor-Leste.
Iha fatin hanesan, Fransisco Sebastião Viegas, parokianu Igreja Sagrado Coração de Jesus Becora, distásia entre Becora ho Tasi Tolu lasai sasukat, fé katólika nee mak lori ema idaidak hasoru Maromak.
“Hau hanoin kona-ba misa iha Tasi Tolu orsida lorokraik, ami hahú ona ami nia viajen no lasente kolen, la sente hamrok no la sente hamlaha, tanba liuhusi Santu Padre ema hotu-hotu bele haree Maromak”, dehan nia.
Notícia relevante: Baucau prepara sarani rihun 50 atu partisipa misa iha Tasi Tolu
Jornalista: Domingos Piedade Freitas
Editora: Isaura Lemos de Deus
