DILI, 11 setembru (TATOLI) – Sua Santidade Papa Francisco, kuarta ne’e husik ona povu Timor-Leste ho Aero Dili ho númeru voo A320 hodi kontinua hala’o viajen apóstolika bá Singapura.
Tuir observasaun Agência TATOLI, nota katak Sua Santidade sai husi Sentru Konvensaun Dili (CCD, sigla portugés), tuir dalan ba aeroportu Nicolau Lobato, sarani kontinua hein iha estrada ninin hodi hetan bensaun ikus liu nian.
Iha parte estátua Nicolau Lobato, komunidade suku Comoro sai tomak hodi hato’o agradesimentu ba Sua Santidade Papa Francisco. 
“Papa, adeus, boa viajen Papa,” sarani sira espresa sentimentu iha estátua Nicolau Lobato bainhira Sua Santidade husi CCD ba aeroportu.
Ho espresaun hirak-ne’e Papa foti liman tuituir dalan tanba sarani sira okupa husi estrada Nicolau Lobato, tama to’o arreadór aeroportu nian.
Iha aeroportu Nicolau Lobato akompaña husi Bispu Dioseze Dili, Dom Virgílio do Carmo da Silva, Bispu Dioseze Maliana, Dom Norberto Amaral, Bispu Dioseze Baucau, Bispu na’in-rua husi Austrália Mgr. Charles Gauci no Mgr. Eugene Hurley.
Nune’e mós Prezidente Repúblika, José Manuel Ramos Horta, Primeiru Ministru, Kay Rala Xanana Gusmão ho membru governu sira.
Observsaun seluk ne’ebé Agência TATOLI katak, bainhira Papa Francisco husik ona aeroportu Nicolau Lobato, sarani sira kuaze tanis hotu.
Bainhira odamatan husi aviaun Aero Dili taka no Papa kontinua foti liman, halo sarani sira-ne’ebé akompaña iha arreadór Nicolau Lobato, matan-been monu tanba Papa durante loron tolu iha Timor-Leste lori mensajen dame, domin no dame ba povu Timor-Leste tomak.
Sua Santidade Papa Francisco husik aeroportu Nicolau Lobato iha oras 12:25. Adeus Papa Francisco
Notísia relevante: “Boa viajen Papa Francisco!” – Sarani sira iha CCD hato’o
Jornalista: Sérgio da Cruz
Editór: Evaristo Soares Martins
