OÉ-CUSSE, 02 Outubru 2024 (TATOLI) – Hahú husi Janeiru to’o Agostu 2024, Diresaun Nasionál Terra no Propriedade (DNTP) Oé-Cusse rejista kazu disputa rai hamutuk 56, maioria problema partikulár.
“Husi kazu sira-ne’e, parte Terra no Propriedade fasilita ona mediasaun. Ita hatene katak prosesu mediasaun ne’e la’ós Terra no Propriedade mak foti desizaun, maibe ita fasilita de’it atu parte rua buka sira-nia solusaun ho justifikasaun”, Diretór DNTP Oé-Cusse, Júlio Coel hateten, ohin.
Nia informa katak durante kazu sira-ne’e rejista, DNTP halo ona mediasaun ba kazu 26 no 23 iha ona akordu, só tolu mak enkamiña ona ba iha Komisaun Terra no Propriedade tanba disputa ne’e entre família uma-laran no ida hasoru Estadu.
Notísia relevante: DNTP Oé-Cusse enkamiña kazu tolu sobre disputa rai ba Terra no Propriedade
“Kazu 56 ne’e rejista ona, maibé sei iha tan 33. Daudaun iha faze identifikasaun atu halo ajenda ka mediasaun”, nia adianta.
Notísia relevante: Lia-na’in husi suku Lalisuk husu DNTP define estatutu rai iha Dolok
Diretór ne’e esplika kona-ba tipu kazu 56 ne’e, balun problema partikulár ema ho ema hadau malu rai Estadu, nune’e fásil bele halo mediasaun.
“Ezemplu, uluk rai abandonadu, sidadaun estranjeiru mak husik hela, agora, tuir lei, ne’e faz parte ona ba Estadu. Se sira hadau malu, ami sei fasilita atu fó solusaun, sé mak atu iha direitu bele hela iha rai ne’e, maibé sira-ne’ebé hela iha rai Estadu mak disputa hela ne’e, tenke prosesu tuir kontratu arrendamentu, tenke selu ba kofre Estadu”, nia hateten.
Rekorde katak, husi Janeiru to’o Agostu 2024, parte DNTP Oé-Cusse rekolla ona reseita $10.535, ne’ebé kontribui husi arrendamentu rai no uma Estadu.
Notísia relevante: DNTP Oé-Cusse rekolla reseita $10.535 husi arrendamentu rai no uma Estadu
Jornalista: Abílio Elo Nini
Editora: Maria Auxiliadora
