OÉ-CUSSE, 17 Outubru 2024 (TATOLI) – Centro Nacional Chega!, Institutu Públiku (CNC, I.P) atribui prémiu jornalizmu ba pás ‘Maria Gorreti Joaquim’ ba órgaun komunikasaun sosiál tolu iha Festivál Fronteira iha Rejiaun Administrativa Espesiál Oé-Cusse Ambeno (RAEOA).
Prémiu ne’e bazeia ba deliberasaun númeru 9/CA/CNC/X/2024. Konsellu Administrasaun prova atribuisaun prémiu jornalizmu ba pás Maria Gorreti Joaquim, ba mídia imprensa, online no televizaun.
Nune’e, CNC atribui prémiu ba Jornal Independente, mídia online Neon Metin Info no RTTL, E.P, ne’ebé kada simu prémiu monetáriu $1.500, tasa figura Maria Gorreti no sertifikadu apresiasaun ba órgaun komunikasaun tolu ne’e.
Notísia relevante: KI atribui prémiu jornalizmu ba jornalista no media vensedór sira
Jornal Independente hetan prémiu ne’e tanba kontribui husi notísia reportajen entitulada ‘Luta inan faluk defisiénsia iha Marabia’, Neon Metin kontribui husi notísia ‘Feto servisu seguransa saláriu $115, istória luta ba moris Sílvia ho Margarida nian’ no RTTL kontribui husi notísia reportajen ‘Domingos tinan ualu ona la eskola tanba difikuldade barak ne’ebé impede nia estudu maibé nia mehi ne’e sai realidade’.
Diretór-Ezekutivu CNC I.P, Hugo Maria Fernandes, dehan prémiu ne’e nu’udar omenajen no lembransa ida ba saudoza Maria Gorreti Joaquim, joven feto ida ho idade 17, ne’ebé envolve aan iha organizasaun UNETIM, organizasaun estudantil ida-ne’ebé pró ba Partidu Fretilin iha 1974.
Ho nia konviksaun polítika mak iha 1976, militár Indonézia kaptura nia hodi dadur nia hahú husi tinan ne’e to’o 1979. Iha fatin oioin, hahú husi fatin dadur otél Tropical no San Tai Ho Dili, sede RTP 15 Teulale-Baucau no oté l Flamboyang-Baucau.
Durante dadur, Maria hetan violasaun oioin husi militár Indonézia ne’ebé toma konta iha fatin dadur sira-ne’ebé nia iha ba. Husi violasaun oioin ne’ebé nia hasoru, nia hasai liafuan ida katak “sira bele kolonializa ha’u-nia isin, maibé sira sei la kolonializa ha’u-nia espíritu no ha’u-nia fuan”.
“Prémiu ne’e liuhusi monitorizasun ba jornalista sira, komesa kedan halo iha fulan-Outubru to’o Jullu mak halo avaliasaun ba obra jornalístika sira-ne’ebé prodús, bazeia ba kritéria inportante no boot mak sira-nia konsisténsia, persisténsia, nomós solidariedade boot atu defende direitu umanu”, Hugo Fernandes relata iha ámbitu atribuisaun prémiu iha Oé-Cusse.
Notísia relevante: PR Horta husu jornalista timoroan nafatin servisu ho profisionál
Tuir nia, la’ós de’it istória pasada nian, maibé nu’udar ema direitu umanu ne’ebé presiza defende mak direitu ba edukasaun, saúde di’ak no moris di’ak.
“Ne’e mak ekipa júri husi CNC, Konsellu Imprensa, nomós Departamentu Komunikasaun Sosiál UNTL halo ona selesaun atu hetan mellór jornalista ne’ebé ami konsidera nu’udar jornalista ne’ebé iha duni konsisténsia no persisténsia atu hakerek kona-ba asuntu direitu umanu”, nia afirma.
Iha fatin hanesan, Prezidente Autoridade RAEOA, Rogério Tiago Lobato, agradese ba CNC I.P tanba ho inisiativa bele fó onra ba Maria Gorreta Joaquim.
“Ha’u-nia admirasaun ba ita-boot sira-nia serbisu. Prémiu ida-ne’e inisiativa kapa’as tebes. Maria Gorreti Joaquim la’ós ema seluk, sei família ho prima Lurdes no tiu Humberto Joaquim nia oan. Nia mate sedu loos. Ita tenke kontinua fó onra ba nia memória liuhusi inisiativa hanesan ne’e”, nia salienta.
Notísia relevante: PM Xanana no PR Horta kongratula jornalista sira
Jornalista: Abílio Elo Nini
Editora: Maria Auxiliadora
