BALIBO, 16 outubru 2024 (TATOLI) – Órgaun Reguladora Konsellu Imprensa (KI) atribui prémiu ho osan montante 1.500,00 USD, trófeu, inklui sertifikadu ba jornalista no órgaun komunikasaun sosiál oioin ne’ebé sai vensedór ka manan-na’in ba kategória prémiu jornalizmu ne’ebé iha, iha ámbitu komemorasaun loron nasionál Liberdade Imprensa ba daruak no tinan-49 trajédia “Balibo Five”, ohin.
Manan-na’in prémiu Konsellu Imprensa ba tinan-2024 mak hanesan tuirmai:
- Prémiu Konsellu imprensa ba órgaun komunikasaun sosiál atribuídu ba Online hatutan.com
- Prémiu Adelino Gomes ba obra jornalístika di’ak liu ba língua portugeza ho títulu obra “A desigualdade do acesso à educação em Timor-Leste, fó ba Jornalista Eduardo Soares husi media Online Diligente;
- Prémiu Borja da Costa, ba traballu jornalístiku di’ak liu kona-ba asuntu sosiál ba media eskrita ka online, ho títulu obra “Sakrifísiu husi laletek Dili” fó ba Jornalista Januario da Conceição husi órgaun komunikasaun sosiál, Jornál Independente;
- Prémiu Greg Seckleton ba traballu jornalístiku di’ak liu husi rádiu ka televizaun ho títulu obra “Esperansa ne’ebé halerik iha Raikotu” fó ba Jornalista Constâncio dos Santos Vieira husi media RTTL, E.P;
Hafoin fó sai rezultadu vensedór ka manan-na’in ba prémiu sira, vensedór ka reprezentante sira hato’o sira-nia hanoin.
- Francisco Belo Simões da Costa, Xefe redasaun Hatutan. Com
“Ida-ne’e hanesan todan ida-ne’ebé ami lori atu labele halo sala iha ami-nia vida jornalizmu. Buat ne’ebé ami tenke halo mak haklaken de’it lia-loos mezmu lia-loos ne’e ema balun la gosta”
- Antónia Kastono Martins, reprezentante Diligente. Com (Jornalista)
“Agradeço muito ao Conselho de Imprensa, nós começamos agora, um ano e pouco, e em Janeiro, fazemos dois anos. Escrevemos em português porque queremos levar as historias do povo de Timor-Leste ao mundo através da língua portuguesa. Este prêmio Adelino Gomes é um incentivo para continuarmos trabalhar para o desenvolvimento do jornalismo em Timor-Leste”. – Ha’u agradese barak ba Konsellu Imprensa, ami hahú agora, tinan ida ho balun, no iha janeiru, ami halo ba tinan-rua. Ami hakerek iha portugés tanba hakarak lori istória Timor-Leste nian ba mundu liuhusi língua portugeza. Prémiu Adelino Gomes ida-ne’e nu’udar insentivu ida atu ami bele serbisu ba dezenvolvimentu jornalizmu iha Timor-Leste”.
- Jorgino dos Santos, Xefe redasaun Jornál Independente
“Agradese ba Konsellu Imprensa ne’ebé atribui prémiu ba Jornál Independente. Agredese tebes ba ekipa Jornál Independente. Agradese ba jornalista sira ne’ebé durante ne’e serbisu maka’as hodi kontribui informasaun ba públiku liuhusi meius ne’ebé ami iha. Ami konsiente katak iha krítika barak ba profisionalizmu jornalizmu nian. Ami konsiente aan katak iha buat barak ne’ebé presiza hadi’a u ba oin ami kompromete katak sei hadi’a di’ak liután. Ida-ne’e rezultadu ba ita Hotu”.
- Costâncio dos Santos Vieira, Jornalista RTTL, E.P
“Ida-ne’e hanesan oportunidade ida. Halo kontente la’ós hetan prémiu maibé notísia, ema ne’ebé ita hakerek, konsege eskola. (…) Ida-ne’e kontente la’ós ha’u mesak maibé ekipa RTTL, E.P tomak”.
Entretantu, Prémiu ba fotojornalizmu nian tinan ida-ne’e la tama kategória. “Tinan-tinan Konsellu Imprensa atribui prémiu ne’e ho kategória lima, iha tinan ida-ne’e, hanesan ita-boot sira (públiku) rona, ita iha de’it kategória haat, kategória Bernardino Guterres ba foto jornalístiku di’ak liu ba tinan ida-ne’e júri sira deside esklui tanba la prienxe kritéria ne’ebé iha,” Diretór ezekutivu KI, António Dias informa.
Enkuantu, atribuisaun prémiu jornalizmu ne’e, nia rezultadu nu’udar prosesu husi Deliberasaun nú. 10/2024, 4 outubru, omologasaun desizaun júri no atribuisaun prémiu sira jornalizmu nian ba tinan-2024 ba premiadu sira.
Tuir nú. 4 artigu 3o husi lei nú. 05/2014, 19 novembru, Lei Komunikasaun sosiál, liuhusi nú. 1 artigu 6 o regulamentu nú. 2/2021, 17 marsu kona-ba atribuisaun prémiu jornalizmu hosi Konsellu Imprensa, permite katak Konsellu Imprensa delibera kategória sira, prosedimentu abertura sira no enseramentu.
Iha serimónia atribuisaun prémiu jornalizmu ba obra jornalítika di’ak liu iha tinan ne’e partisipa no asiste direta husi Vise-ministru asuntu parlamentár no komunikasaun sosiál, Aderito Hugo, inklui konvidadu no autoridade sívil no militar no mós komunidade sira.
Tatoli
