OÉ-CUSSE, 17 Outubru 2024 (TATOLI) – Motorista mikrolete sira iha Rejiaun Administrativa Espesiál Oé-Cusse Ambeno (RAEOA) ezije ba Diresaun Nasionál Transporte Terrestre (DNTT) atu regula movimentu karreta angguna no tum-tum iha Oé-Cusse Vila.
Portavós motorista José Palat hateten, durante ne’e, angguna no tum-tum halo sirkulasaun la tuir regra, tanba okupa dalan mikrolete sira iha vila, nune’e afeta ba sira ladún hetan lukru kada loron.
Tanba ne’e, sira husu ba DNTT no Polísia Nasionál Timor-Leste (PNTL), liuhusi seksaun Tránzitu, nomós autoridade RAEOA atu regula tuir tarrefa ba movimentu transporte sira.
“Ami ezije liu ba parte tolu, nune’e bele hadi’a sistema hodi ajuda mikrolete bele hetan netik osan”, José Palat hato’o iha terminál Tono, kuarta ne’e.
Notísia relevante: Motorizada ilegál 1.919 iha Oé-Cusse hahú rejista atu hetan dokumentu
Nia sujere mós ba Polísia Tránzitu no DNTT atu kontrola beibeik movimentu transporte sira iha terrenu, tanba durante ne’e akompaña sira (Tránzitu) hala’o de’it pasa-revista hodi rekolla reseita ba kofre Estadu, maibé ladún kontrola transporte sira atu halai tuir nia diresaun.
“Tan ne’e mak ita ejize ba sira atu koloka sira-nia funsionáriu iha terrenu hodi kontrola. Karta ne’e mós ami ejize ba Prezidente Autoridade, atu inaugura ona terminál Tono, nune’e hotu-hotu bele mai para iha ne’e no tenki halo planu ida oinsá halo terminál ida iha ponte Noefefan no tau mós postu polísia iha ne’ebá atu kontrola mikrolete hotu. Ami husu atu evita problema entre motorista sira hanesan tum-tum, mikrolete no angguna, tanba durante ne’e akontese problema”, dehan.
Iha fatin hanesan, motorista Pedro dos Santos Neno husu ba DNTT atu kontrola karreta Angguna sira, tanba durante ne’e halo movimentu husi foho bá liu portu ho pasajeiru, nune’e afeta ba mikrolete sira laheten pasajeiru iha vila.
“Ami-nia ejizénsia ba tum-tum ho angguna sira de’it, tanba sira sai husi portu [ponte kais] bá liu foho, husi foho mai liu bá portu ho pasajeiru nakonu. Ne’e mak ami lakohi, tanba mikrolete iha vila laran, entaun ami la hetan pasajeiru. Tanba ne’e, husu ba Prezidente Autoridade RAEOA no PNTL, liuliu sesaun Tránzitu sira tenke kontrola atu halai tuir idaidak nia jalur”, nia husu.
Hermenegildo Abi reforsa katak persiza inaugura terminál Tono, nune’e bele uza tanba Angguna mai husi foho atu hatún pasajeiru maibé terminál laiha.
Hatán ba ezijénsia ne’e, Xefe Departamentu DNTT Oé-Cusse, Domingos de Almeida, klarifika katak durante ne’e DNTT regula ona, maibé falta kontrolu tanba seidauk iha fatin terminál própriu.
“Durante ne’e ita regula katak angguna mai to’o de’it ponte Noefafan, nomós para de’it iha Tono, maibé Governu halo ona terminál Tono, tempu besik sei entrega ona ba Autoridade, entaun automátiamente mikrolete ho angguna ita sei kontrola sira di’akliu tán, maibé tum-tum sira mós iha direitu atu tula pasajeiru, maibé halai iha vila de’it, sira la tama iha terminál ne’e. Sira mós iha direitu tanba sira mós selu taxa ba Estadu”, nia informa.
Notísia relevante: Motorista Oé-Cusse preokupa karta kondusaun provizória no la vale iha Díli
Jornalista: Abílio Elo Nini
Editora: Maria Auxiliadora
