COVALIMA, 22 Outubru 2024 (TATOLI) – Programa Nasionál Dezenvolvimentu Suku (PNDS) Covalima implementa ona, iha 2023 no 2024, projetu 73 ne’ebé prioritiza ba setór saúde, edukasaun, agrikultura no infraestrutura.
Diretór PNDS Covalima, Pedro de Araújo Gomes, esplika katak implementasaun projetu sira ne’e mak halo konstrusaun rezidénsia ba pesoál saúde, harii muru protesaun ba eskola, uma merenda eskolár, dada bee-moos ba komunidade, konstrusaun ba irrigasaun, drainajen, reabilitasaun estrada no ponte ki’ik ne’ebé realiza iha postu hitu iha suku 30.
“Iha 2023 no 2024, ita implementa projetu hamutuk 73 ne’ebé nia progresu balun konsege konklui, balun sei iha prosesu”, Pedro Gomes dehan iha Sukaer-Laran, ohin.
Projetu 73 ne’e – 36 projetu 2023 nian ne’ebé la konsege implementa, nune’e foin realiza iha tinan ne’e. Iha 2024, eziste projetu 37 no nia progresu serbisu foin atinje porsentu 50.
Pedro Gomes salienta katak, iha implementasaun projetu 2024, PNDS hasoru difikuldade tanba empreza fornesedora materiál bá postu sira limitadu, nune’e prejudika atu halo serbisu no traballadór halo konstrusaun la tuir planta no kadernu enkargu (BoQ).
Orsamentu Jerál Estadu 2023 ne’ebé aloka ba PNDS hodi implementa projetu 36 ho montante $1,279.446,48 no gasta ona $677.680,21 no ba 2024 iha projetu 37 ho totál verba $1,329.000 no gasta ona $181.399,93.
PNDS mós simu ona orientasaun husi Ministériu Administrasaun Estatál atu orientan ba Programa Nasionál Suku hodi aselera implementasaun projetu PNDS hotu iha Novembru 2024, maibé depende mós ba situasaun klimátika.
Notísia relevante: PNDS Covalima loke konkursu públiku ba ema 25
Jornalista: Celestina Teles
Editora: Maria Auxiliadora
