DILI, 22 outubru 2024 (TATOLI)–Organizasaun Special Olimpcs Timor-Leste (SOTL) promove ema ho defisiénsia(EhD) sira liuhusi atividade lideransa hanesan ko’alia iha oin, aprende arte no dansa.
Prezidente Special Olimpcs Timor-Leste (SOTL), Maria Domingas Fernandes Alves, hateten sei la husik ema ho defisiensia ida ba kotuk liuhusi programa no atividade SOTL nian, nune’e ema ho defisiensia hamtuk 12 kompostu husi feto lima (5) no mane hitu (7) tuir formasaun ba iha programa Athlete Leadership no Youth Activation iha tinan ne’e.
“Ha’u hanesan prezidente SOTL orgullu ho imi-nia abilidade ne’ebé iha. Maske sei iha limitasaun barak maibé imi iha vontade atu aprende. SOTL iha kompromisu atu kontinua promove imi-nia abilidade ida inkluzivu ba ema hotu,” Prezidente SOTL, Maria Domingas Fernandes Alves, hateten iha atividade aprezentasaun abilidade no kreatividade ema ho defisiénsia, iha salaun Luz Clarita, tersa ne’e.
Prezidente reforsa, Ministériu Solidariedade Sosiál no Inkluzaun (MSSI) aloka kada tinan orsamentu hamutuk $31,633.67 ba SOTL hodi promove atividade ba ema ho defisiensia sira.
Reprezentante EhD, Aurelia Sarmento, hato’o sentimentu haksolok tanba bele hatudu ami-nia abilidade no koñesimentu balun durante ne’e ho SOTL nia mentor sira no xefe sira.
“Ha’u kontente loos, tanba durante ne’e ha’u bele aprende hamutuk ho ha’u-nia kolega sira seluk, oinsa pinta, ko’alia iha oin no buat seluk tan mak ami bele aprende,” nia dehan.
Nia mós hato’o agredesimentu ba Ministériu Solidariedade Sosiál no Inkluzaun, tanba nafatin iha kompromisu hodi fó apoiu ba ema ho defisiénsia iha Timor-Leste.
“Ami agradese ba Prezidente SOTL no mentór no xefe sira-ne’ebé servisu makaas no dedika tempu hanorin ami hodi aprende buat barak, maske ami iha limitasaun,” nia dehan.
Ema ho defisiénsia ne’e mós husu ba Governu atu kontinua apoia SOTL atu bele tau matan nafatin no fó oportunidade ba ema ho defisiénsia sira atu aprende.
Jornalista : Jesuína Xavier
Editór : Cancio Ximenes
