MSSI apoia ai-han ba ema vulneravel iha Pante Makasar
OÉ-CUSSE, 24 Outubru 2024 (TATOLI) – Ministériu Solidariedade Sosiál no Inkluzaun (MSSI) apoia nesesidade bázika ba família vulneravel no Ema ho Defisiénsia (EhD) hamutuk na’in-25 iha bairru Upmetan, aldeia Mahata, suku Costa, sub-rejiaun Pante Makasar.
Xefe Departamentu MSSI Oé-Cusse, Víctor Manuel de Paixão, informa katak apoia ba benefisiáriu na’in-25 ne’e, tanba autoridade lokál sira mak rekolla dadus no persiza fó tulun ba sira, tanba bairru ne’e izoladu liu.
“Ami lori foos kilógrama 25, biskuit, ikan lata, susu-been, mina sona no ai-han seluk tan. Apoia ne’e ba família vulneravel 16 no Ema ho Defisiénsia na’in-sia. Dadus ne’e ita simu husi autoridade lokál sira, ita mai oferese de’it”, Vitór Manuel de Paixão hateten iha Upmetan, ohin.
Notísia relevante: Autoridade apoia nesesidade bázika ba uma-kain 74 iha Naktuka
Nia salienta katak atividade apoia umanitária ne’e realiza kada trimestrál, maibé depende ba proposta husi xefe suku no xefe aldeia sira atu identifika família ne’ebé merese duni atu hetan tulun.
“Dezde fulan-Marsu ita haleu ona suku 18 iha Oé-Cusse. Ohin, ita iha Upmetan, depois sei kontinua bá bairru seluk iha suku Lalisuk no Cunha, ne’ebé alvu hanesan ba kbiit-la’ek no Ema ho Defisiénsia”, nia dehan.
Iha fatin hanesan, xefe suku Costa, Francisco Colo, dehan apoiu ne’e prioriza ba ba sira-ne’ebé defisiénsia no vulneravél ne’ebé kompozisaun ne’e família ida iha oan barak no laiha dependénsia ba atividade ruma. “Entaun, ida-ne’e mak ita tau prioridade atu hetan apoia umanitária ne’e no la politiza tuir kór polítika”, afirma.
Notísia relevante: Prezidente Repúblika apoia nesesidade bázika ba família 77 iha Oé-Cusse
Benefisiáriu Manuel Colo agradese tanba Governu bele oferese apoia ba komunidade sira iha bairru Upmetan. “Ami nu’udar kbiit-la’ek simu apoia ne’e ho kontente. Ami sei la fa’an, maibé uza atu han de’it, tanba ami iha bairru Upmetan foin dahuluk simu apoia hanesan ne’e husi Governu”, nia realsa.
Marta Elo hanesan mós benefisiária kontente no husu atu kontinua tulun sira tanba sira-nia hela fatin dook husi estrada boot.
Notísia relevante: PR Horta sei apoia nesesidade bázika ba feto 50 iha Oé-Cusse
Totál uma-kain ne’ebé hela iha bairru Upmentan hamutuk 31, nu’udar fatin izoladu tanba hela do’ok husi estrada, maibé asesu ona liña eletresidade no bee-moos.
Jornalista: Abílio Elo Nini
Editora: Maria Auxiliadora
