COVALIMA, 04 Novembru 2024 (TATOLI) – Polísia Nasionál Timor-Leste (PNTL) Covalima aprezenta ona kazu labarik na’in-rua mate, Jenila Selomitha Jordão Gusmão no Jiovanio Jordão Gusmão, iha aldeia Sukabilan, suku Suai Loro, postu administrativu Suai, ba Ministériu Públiku (MP).
Komandante PNTL Covalima, Superintendente Polísia Calisto Gonzaga, dehan tuir loloos kazu kona-ba labarik na’in-rua nia mate ne’e halo ona primeiru interrogatóriu, maibé tanba hasoru loron boot finadu, entaun seidauk hahú no hein desizaun husi MP.
“Hafoin akontese insidente labarik na’in-rua hakotu iis, ita aprezenta kedan ba Ministériu Públiku, tanba foin lalais monu iha loron boot finadu, nune’e tilulár Ministériu Públiku laiha fatin no suspeitu iha hela prosesu tratamentu”, Superintendente Polísia Calisto Gonzaga dehan iha Santa Rosa, ohin.
Tanba ne’e, tuir nia, prosesu kona-ba labarik matebian na’in-rua nia ba fali prosesu normál no ohin PNTL kontinua aprezenta ba MP atu fó prioridade, nune’e públiku bele hatene medida ne’ebé tribunál atu foti ba suspeitu.
Notísia relevante: PNTL seidauk hatene motivu husi labarik na’in-rua hakotu iis iha Suai Loro
Iha prosesu investigasaun, PNTL mós rekolla ona informasaun kona-ba motivu husi kazu labarik na’in-rua nia mate, nune’e MP anota ona no hein prosesu kontinuasaun ba desizaun saida mak atu foti.
“Dadaun ne’e, matebian na’in-rua nia ama nia kondisaun saúde rekopera ona, maibé seguransa nafatin asegura nune’e bele responsabiliza nia atu bazeia ba lei ne’ebé vigora”, dehan.
Lembra katak matebian Selomitha Jordão Gusmão, tinan 7, no Jiovanio Jordão Gusmão, tinan 6, hakotu iis iha loron 28 Outubru, ne’ebé sira-nia isin mate hetan iha tanke bee nia laran, no hakoi ona iha loron 31 Outubru ne’e.
Notísia relevante: Autopsia la’o ho di’ak HNGV entrega ona matebian na’in-rua ba família
Jornalista: Celestina Teles
Editora: Maria Auxiliadora
