DILI, 11 novembru 2024 (TATOLI)–Governu liuhusi Ministériu Administrasaun Estatál (MAE), segunda ne’e, entrega motorizada 62 ba xefe suku sira iha munisípiu Dili hodi apoia autoridade lokál sra-nia serbisu iha terrenu.
Minsitru Administrasaun Estatál (MAE), Tomas do Rosário Cabral, husu ba xefe suku sira atu kontrola Programa Nasionál Dezenvolvimentu Suku (PNDS) no husu atu uza motorizada sira-ne’e ba servisu administrasaun no sosiál suku nian.
Governante ne’e husu ba xefe suku sira atu uza rekursu Estadu nian hodi halo atendimentu no hakbesik aan ba populasaun ba iha servisu sosiál.
“Depois entrega motorizada sira-ne’e, ha’u husu ita -boot sira atu ba liu iha aldeia, ba besik komunidade, ajuda administrasaun sira halo levantamentu. Xefe suku sira iha Dili laran ne’e tenke mobiliza ba serimonia sira, tanba halo parte serbisu suku nian. Asuntu administrasaun, ita tenki kontrola malu,” Ministru Administrasaun Estatal; Tomás do Rosário Cabral, husu ba xefe suku sira iha serimonia entrega motorizada 62 ba xefe suku sira munisipiu Dili, iha Colmera.
Nia husu atu xefe suku sira serbisu hamutuk ho autoridade munisipál ba asuntu sosiál, atu reativa admisnitrasaun suku ne’e, tanba xefe suku sira nia papel atu jere administrasaun iha suku ne’e,
Tuir nia, fundu Programa Nasionál Dezenvolvimenti Suku (PNDS) koloka ona iha munisipál, xefe suku sira iha responsabilidade atu kotrola ida-ne’e, labele dehan programa ne’e sentrál nian, tama ona iha kompeténsia munisipál.
“Xefe suku sira atu kontrola implementasaun projetu PNDS iha ita-bo’ot sira-nia suku, iha ema na’in haat mak ida ba asuntu administrasaun, finansa, sosiál no ida sekretária hodi halo programa ba xefe suku sira. Halo rejistu populasaun ho demografia ba lista terseira idade. Motorizada sira atu halo atividade sira hodi mellora servisu suku,” nia apela.
Aleinde ne’e, Goverante ne’e hateten, xefe susku iha papel atu informa ba populasaun kona-ba atualizasaun kartaun eleitral ba kartaun biométriku hodi fasilita populasaun ba asuntu administrasaun liuliu eleisaun no pensaun sira.
Diretór Nasional Apoiu Administrasaun Suku (DNAAS) iha MInistériu Administrasaun Estatál (MAE), Celestino Marques, hateten Ministériu Administrasaun Estatál sosa motorizada hamutuk 904 ba xefe suku sira iha territóriu hodi apoiu servisu autoridade lokal sira-nian.
“Ohin, munisipiu Dili nian entrega ona hamutuk 62. Empreza vensedora tula hotu ona ba xefe sira iha munisipiu hotu-hotu inklui Ataúro no Rejiaun Administrativu Espesiál Oé-Cusse Ambeno,” nia relata.
Xefe Metiaut, postu administrativu Cristo Rei, munisípiu Dili, Mateus Inácio da Costa, hateten suku Metiaut simu motorizada ba daruak hodi bele hala’o servisu suku nian iha mandatu, tanba sente kontente simu motorizada rua atu fasilita servisu administrasaun suku nian.
“Ha’u garante, tanba suku Metiaut iha aldeia tolu de’it. La’ós agora de’it maibé durante ne’e ami la’o hela duni hanesan ne’e, ne’eduni la’ós buat foun ida,” nia dehan.
Jornalista : Jesuína Xavier
Editór : Cancio Ximenes
