OÉ-CUSSE, 12 Novembru 2024 (TATOLI) – Iha kalan reflesaun ba 12 Novembru, ne’ebé realiza iha Sentru Juventude Rejiaun Oé-Cusse, Paróku Igreja Nossa Senhora do Rosário Numbei, Júlio do Carmo, akompaña husi Prezidente Komité 12 Novembru Rejiaun Administrativa Espesiál Oé-Cusse Ambeno (RAEOA), Domingos de Almeida, no Konsellu Veteranu Oé-Cusse, Jeferino da Cruz Sa’u, hadame ona protokolu Prezidente Autoridade (PA) RAEOA, Aquito Roxaca Guterres, ho jornalista Ajénsia Notisioza Timor-Leste, Institutu Públiku (Tatoli,I.P) Abílio Elo Nini.
Pároku Igreja Numbei, Júlio do Carmo, hateten loron 12 Novembru mak loke dalan ba ukun rasik-aan iha 1991 no iha 12 Novembru 2024 lori mós laran-malirin no neon-ksolok ba ema hotu tanba buat ne’ebé akontese iha pasadu, nu’udar ema normál emosaun sempre iha.
Nune’e, dalaruma buat ne’ebé ema la konxiente no la kontrola aan, ikus mai hamosu buat ruma, maibé bainhira konxiente filafali sei hado’ok buat sira ne’ebé folin-la’ek.
“Ne’ebé, sira-na’in rua hili hakarak di’ak no simu malu. Ita agradese no fó apresisaun ba sira, agradese tanba sira mós bele deside hodi kria fali amizade ne’ebé di’ak. Ohin kalan ita iha ne’e sai sasin ba sira na’in-rua ninia simu malu, espera ba oin buat hirak-ne’e hotu sai hanesan istória ida hodi hanoin katak buat ida hirus-malu ne’e ladi’ak ida. Entaun, ohin ita hadi’a no ba oin bele sai belun ida ne’ebé di’akliu”, Padre Júlio ko’alia iha ámbitu reflesaun ne’e.
Notísia relevante: KI: Hahalok husi protokolu PA RAEOA laiha étika
Saserdote ne’e dehan nu’udar timoroan persiza tane malu no hadomi malu tu kuda hanoin di’ak iha kakutak, nune’e bele kontribui ba prosesu dezenvolvimentu nasaun nian.
“Parabéns, ita hotu sai sasin ba sira na’in-rua ninia dame malu no simu malu nu’udar maun-alin iha família ida nu’udar ema timoroan”, amu Júlio hato’o.
Notísia relevante: AJTL-TLPU kondena protokolu PA RAEOA impede serbisu Jornalista
Rekorde katak, iha inisíu juñu, mosu dezentendimentu entre jornalista Tatoli, Abílio Elo Nini, no protokulu PA RAEOA iha otél Ambeno iha momentu selebrasaun akordu entre Autoridade RAEOA no Timor-Aid.
Mosu falta Komunikasaun nune’e akontese jornalista no protokolu dala malu no parte rua tenta halo agresaun fízika ba malu. Akontesimentu ne’e halo asosiasaun jornalista, Konsellu Imprensa, Parlamentu Nasionál no Prezidente Repúblika kondena atu ne’ebé akontese tanba tenta impede serbisu jornalista iha terrenu.
Notísia relevante: Rogério Lobato sei suspende protokolu ne’ebé impede serbisu Jornalista
Jornalista: Abílio Elo Nini
Editora: Maria Auxiliadora
