DILI, 12 novembru 2024 (TATOLI)—Antigu Prezidente Repúblika (PR), Fransisco Guterres Lú Olo, husu ba juventude sira atu kontinua harii no hametin futuru ne’ebé prósperu.
“Loron 12 novembru hanesan Juventude Nasionál Loriku Asu’wain ne’e atu kontinua harii no hametin futuru ne’ebé prósperu ba rai ida-ne’e no hodi kontinua kaer metin nafatin espéritu Juventude Loriku Asu’ain iha tinan-33 liubá,” Lú Olo hato’o hafoin partisipa iha loron selebrasaun loron Juventude Nasionál Loriku Asu’wain ba dala-XXXIII, iha semináriu Santa Krús, tersa ne’e.
Nia dehan, juventude nia sakrífisiu no martir sira seluk mak ohin loron bele kontribui di’ak liu ba dezenvolvimentu rai-laran, nune’e nafatin hamutuk hodi lori dezenvolvimentu ba rai-laran no povu.
“Ha’u hakarak fó mensajen ba juventude sira atu lori dezenvolvimentu ba ita-nia rain. Tanba ho sira-nia mate mak bele lori folin boot ida-ne’e. Husu joven sira atu lori serbisu ba ita-nia rain hanesan mós sira seluk ne’ebé uluk fó sira-nia vida ba rai ida-ne’e. La’ós ita fó tan ita-nia vida maibé tenke ho kbiit hodi bele hadi’a no lori dezenvolvimentu ba oin,” nia hameno.
Notísia relevante : Loron juventude nasionál atu valoriza martir no eroi joven sira
Iha biban hanesan, Prezidente interinu Komité 12 de Novembru, Filipe Rodrigues, husu ba juventude rezisténsia atu fó kontribuisaun maka’as ba luta libertasaun nasaun no husu ba joven sira agora tenke kontribui maka’as ba dezenvolvimentu.
“Husi prosesu moruk ne’ebé joven sira liu iha pasadu mak halo ohin loron bele kontribui ba Timor- Leste hetan nia independénsia no hamrik hanesan nasaun soberanu ida. Tanba ne’e, joven agora tenke buka estuda maka’as hodi luta ba dezenvolvimentu lori nasaun ne’e ba futuru ida nabilan. Governu daudaun ne’e fasilita timoroan hotu atu hetan eskola gratuita, hahú husi Pré-Eskolár to’o Sekundariu, nune’e joven sira tenke estuda maka’as atu hetan valór di’ak hodi tama iha Universidade Estadu ne’ebé selu baratu. Tanba ne’e, laiha razaun atu joven sira lakohi bá eskola tanba imi mak futuru nasaun nian,” Filipe dehan.
Jornalista : Osória Marques
Editora : Julia Chatarina
