OÉ-CUSSE, 13 Novembru 2024 (TATOLI) – Komandu Jerál Polísia Nasionál Timor-Leste (PNTL) nomeia Inspetór Xefe Polísia, Herman Metan, nu’udar Komandante Eskuadra sub-rejiaun Pássabe ho nia adjuntu mak Sarjentu Xefe Polísia Costâncio da Silva.
Nomeasaun ne’e ho termu pose númeru 335/SPFA-OEC/PNTL/XI/2024, bazeia ba despaxu nomeasaun kargu xefia husi Komandu Jerál PNTL númeru 567/CG-PNTL/XI/2024 ho asuntu nomeasaun ba kargu komandante eskuadra no komandu nomeia mós Xefe Seksaun Formasaun no Administrasaun, Inspetór Polísia Gaspar Ximenes.
Hafoin serimónia tomada pose, Komandante PNTL Oé-Cusse, Superintendente Polísia, Nicolau Francelino da Costa, esplika nomeisaun ne’e lei orgánika PNTL iha ártigu 81 prevista kona-ba kompeténsia komandu atu nomeia, transfere no koloka membru PNTL sira iha munisipíu nia laran, tuir nesesidade instituisaun PNTL Oé-Cusse nian.
Notísia relevante: PNTL Oé-Cusse sei asegura loron finadu
“Ha’u husu ba komandante foun Pássabe, ohin, simu ona knaar ne’e halo serbisu ho responsabilidade, maibé la’ós ba ida foun ne’e de’it, ba mós Eskuadra Oésilo, Nítibe no Pante Masakar. Ha’u hakarak imi serbisu ho fuan no laran, kontinua halo kontaktu permanente ho komunidade sira iha suku 18”, Nicolau Francelino da Costa hato’o iha ámbitu serimónia iha kuartél PNTL Oé-Cusse.
Dirijente PNTL ne’e fó hanoin ba komandante eskuarda sira atu koopera ho entidade sira iha nivel aldeia, nune’e bele mellora serbisu PNTL.
“Suku sira-ne’ebé besikliu imi tenke koopera, tanba ita komandu nia serbisu atu hetan susesu, konta mós ho komunidade, xefe suku, veteranu, joven sira, igreja no entidade relevante sira seluk. Imi tenke koopera ho sira, tanba komunidade sira persiza ita-nia prezensa iha sira-nia leet”, nia apela.
Komandante ne’e solisita atu polísia ativa iha atividade suku no aldeia no labele hamta’uk komunidade no labele abandona serbisu, tanba PNTL nia knaar atu fó seguransa ba populasaun durante oras 24.
“Ha’u lakohi rona komandante sira bá hala’o serbisu, maibé kria fali problema iha komunidade, ne’e ha’u la konkorda. Hakarak serbisu tuir korridór lei no tuir regra empeñamentu ne’ebé iha. Ha’u lakohi rona katak polísia ida ameasa komunidade ho kilat, ne’e labele akontese”, nia fó hanoin.
Notísia relevante: Komisaun B observa PNTL Oé-Cusse menus komputadór no transporte
Iha biban ne’e, Komandante eskuadra sub-rejiaun Pássabe, Inspetór Xefe Polísia Herman Metan, promete iha nia juramentu pose katak sei hala’o serbisu ho responsabilidade no hakru’uk ba lei sira.
“Ha’u Inspetór Xefe Polísia Herman Metan, ho númeru identifikasaun Polísia 10896, jura sei hala’o knaar hanesan komandante eskuadra ho responsabilidade tuir lei no prosedimentu legál sira”, nia promete.
Jornalista: Abílio Elo Nini
Editora: Maria Auxiliadora
