COM, 20 movembru 2024 (TATOLI) – Bee mak fó moris ba ema, ai-horis no balada, laiha bee, laiha moris, tanba ne’e, bee-moos importante tebes ba ema nia moris no sai ona konsumu permanente ba moris lorloron nian.
Timor-Leste hanesan nasaun illa ki’ik ida ne’ebé tempu naruk komunidade lokál sira komesa kria ona bee-matan tradisionál sira hodi fasilita sira hodi konsumu loroloron no utiliza halo atividade agrikola, animál sira tanba ne’e bee sai ona asuntu importante iha komunidade sira iha área rurál no mós urbana iha teritóriu nasionál.
Relasiona ho mudansa klimátika ne’ebé afeta iha tempu bailoron-naruk halo bee-matan sira, bee-menus hodi implika ba komunidade menus konsumu bee-moos, animál no mós atividade agrikultura sira hanesan halo toos no natar no seluk tan afetadu.
Realidade akontese iha komunidade Suku Com, Postu administrativu Lautem, Munisípiu Lautem ne’ebé bee-moos menus iha bee-matan sira tanba efeitu husi tempu bailoron naruk, kuaze atu tama ona ba époka udan nian maibé, udan seidauk monu rai, maske komunidade fila rai no kuda ona batar no produtu seluk maibé mate fali.
Bee-matan hirak ne’ebé antes ne’e komunidade sira uza bá konsumu mak Kamikuru, Iramasi ho Bee-matan Kamanu. Maibé impaktu hosi bailoron ne’ebé naruk, halo bee-matan sira menus no balu maran.
Tuir Abitante Suku Com, Oligario da Costa, hateten iha tinan ida-ne’e, tama ona ba fulan-Novembru, komunidade lokál sira iha Suku Com menus bee-moos tanba implika husi mudansa klimátika iha ne’ebé tama ona ba novembru udan seidauk monu rai, nune’e bee- matan sira ne’ebé utiliza hodi fornese bee-moos ba komunidade menus hodi implika ba komunidade Com menus asesu ba bee-moos.
“Iha ne’e agora ami sente los bee-moos menus, ita kompara ho tinan uluk ami la menus bee-moos no ami lahalerik ba bee-moos maske ami laiha jestaun ba bee moos ho di’ak maibé bee moos sempre iha ba ami, turuk loroloron maibé agora laiha tanba ho mudansa klimátika ne’ebé iha rezulta bailoron naruk halo bee matan sira bee menus, entaun ita hare ba débitu bee ne’e tun, bee mai mós uitoan, nune’e ense ba tanke sira dalaruma la nakonu no atu fahe ba ba komunidade sira la to’o’’, Costa iha Suku Com dehan ba jornalista sira hafoin Organizasaun Timor-Leste Press Union (TLPU) efetua kobertura munisipál iha segunda ne’e, iha Suku Com.
Abitante ne’e afirma liután, ho mudansa tempu implika bailoron naruk halo bee matan sira ne’ebé durante ne’e la maran sai maran hotu hodi fó efeitu ba bee moos menus hodi fornese ba komunidade sira.
“bee-matan balu uluk la maran, ha’u haree maran no maran liu no afeta tebes ba ami, ho ida-ne’e ami komunidade baibain diskute atu halo jestaun ba bee moos, ami servisu hamutuk ho autoridade munisípiu no entidade relevante hodi hala’o jestaun ba bee, atu labele afeta ba komunidade sira’’, Costa katak iha nia rezidénsia iha Suku Com, Postu Administrativu Lautem, Munisípiu Lautem segunda ne’e.
Autoridade lokál Suku Com rekoñese falta bee-moos tanba komunidade la halo jestaun ba bee ho di’ak.
Tuir Xefe Suku Com, Postu Lautem, Munisípiu Lautem, Sergio José Cristovão rekoñese bailoron naruk susar ba bee-moos tanba komunidade la utiliza bee ho di’ak no la halo jestaun ba bee ho di’ak maske forma ona ekipa jestaun bee nian maibé kontinua mosu kestaun bee-moos.
“Klaru bailoron naruk susar ba bee-moos maibé bee la maran liu, bee sempre naton maibé komunidade mak lahatene halo jestaun ba bee, ita forma hela ekipa jestaun bee nian kompostu husi ema nain rua to ha’at hodi halo jestaun ba bee maibé labele rezolve ho di’ak tanba komunidade balu loke hela torneira to 24 oras la komprende ba maluk seluk nune’e implika ba ema seluk labele hetan bee moos hateten’’ Xefe Suku Com ba jornalista sira iha Sede Suku Com, segunda ne’e.
Autoridade lokál ne’e bolu ona Xefe Aldeia sira hodi koalia ba kestaun ne’e no mós koordena ho autoridade Programa Nasional Dezemvolvimentu Suku no mos hamutuk ho Komunidade hodi buka mekanizmu oinsa bele atua iha situasaun sira ne’ebé implika husi mudansa klimátika atu komunidade labele hasoru problema bee-moos iha sira nia suku.
“Iha aldeia tolu iha leten komunidade rihun rua resin maibé jestaun bee di’ak hela iha aldeia tolu iha kraik komunidade naton maibé jestaun ba bee ladún di’ak tanba ne’e komunidade tenke iha konsiénsia utiliza bee nune’e ema hotu bele hetan bee moos’’, Autoridade komunitariu ne’e dehan.
Nia husu ba xefe aldeia sira atu aproxima ba komunidade sira atu hasae konsiénsia hodi utiliza bee -moos ho di’ak hodi halao jestaun ba bee-moos, nune’e komunidade seluk bele hetan hotu bee.
Autoridade lokál Suku Bauro, Postu Lospalos rekoñese bee-moos menus tanba mudansa klimátika.
Tur Xefe Suku Bauro, Postu Administrativu Lospalos, Munisípiu Lautem, Florindo Miranda Ximenes haktuir ho mudansa klima ne’ebé iha halo bee menus tebes tanba bailoron naruk, aleinde implika ba ema fó efeitu mós ba agrikoltór sira tanba sira kuda tiha batar, udan la monu rai, hodi afeta ba produtu hirak ne’ebé sira kuda la moris no mate hotu.
“Mudansa klimátika ne’e afeta laos animál de’it maibé ba populasaun agrikultór sira tanba bee la iha afeta tebes ba sira nia toos no natar. Komunidade sira kuda tiha batar maibé batar la moris tanba la iha udan been, balun fila rai tiha tanba udan la estavel, komunidade la kuda batar ikus du’ut mak moris fali tanba ne’e ho mudansa klimátika ne’e afeta tebes ba ema ho animál sira’’, Xefe Suku Bauro esplika iha Sede Suku Bauro, segunda ne’e.
Autoridade Suku Bauro ne’e afirma, ho mudansa tempu ne’ebé rezulta bailoron naruk afeta mós ba animál sira mate hanesan rusa iha área sira iha Parke Nasionál Nino Konis Santana liu-liu rusa sira iha Illa Jaco ninian.
Kestaun menus bee-moos iha parke nasionál iha tinan hirak liu ba mós akontese ho bailoron naruk ne’ebé hamosu rusa barak mate no atua husi Ministériu Agrikultura Pekuaria Peskas no Floresta nia ekipa konsege lori bee ba rusa sira iha Illa Jaco.
Suku hirak ne’ebé menus bee-mos iha parke nasionál mak Suku Com iha Postu Administrativu Lautem, Munisípiu Lautem ho Suku Bauro iha Postu administrativu Lospalos, Munisípiu Lautem.
Tuir dadus ne’ebé iha, Suku Com iha aldeia ne’en mak Aldeia Vailovaia, Muapusso, Lohomatu, Etepiti, Pitileti no Ira-Ono ho populasaun hamutuk 3871, kompostu husi feto 1906 Mane 1936, Xefe Família hamutuk 883 no Suku Com ho nia luan 48.42.km2
Iha Suku Bauro, Postu Administrativu Lospalos, Munisípiu Lautem ho totál populasaun hamutuk 3840, kompostu husi mane 1948 no feto hamutuk 1892 no Xefe Família hamutuk 821.
Parke Nasional Nino Konis Santana
Parke Nasionál Nino Konis Santana nu’udar parke nasionál dahuluk ne’ebé kria iha Timor-Leste ho área totál 1.236 km² ne’ebé 556 km2 hanesan área tasi nian ne’ebé riku ho formasaun korál.
Área parke nian inklui rai no paizajen tasi nian oioin, inklui ahu-ruin sira ne’ebé luan no mós área boot liu ne’ebé sei moris hosi rai-maran tropikál sira no ai-laran tropikál mosaun nian iha illa Timor. Área terrestre no tasi nian inklui habitatante oioin, ne’ebé destaka tanba biodiversidade hosi sira-nia flora no fauna. Iha nia laran lokáliza área konservasaun habitante no populasaun manus importante tolu ne’ebé dezignadu hanesan IBA – Área Manu importante hosi programa ne’ebé dezenvolve hosi Bird Life International. Área sira-ne’e maka: TL06 – Loré, TL07 – Foho Paitcha’u no Lagoa Iralalara no TL0–Illa Jaco iha parke ne’e nia laran iha manu espésie 25 ne’ebé endémiku iha Timor no illa sira ne’ebé besik, inklui kakatua sulfuroza (Cacatua sulphurea), manu-fuik ho krista mean. kakatua ne’ebé konsidera “iha perigu krítiku” hosi kaptura ba komérsiu internasionál, no espésie endémika Timon green pigeon (Treron psittaceus), Timor imperiál pigeon (Ducula cineracea) no Timor sparrow (Padda fuscata), ida ikus ne’e konsidera vulneravel hosi IUCN tanba lakon ai-laran mosaun nian iha illa Timor.
Jornalista : Anito Soares
Editór : Zezito Silva
