OÉ-CUSSE, 20 Novembru 2024 (TATOLI) – Sekretaria Estadu Protesaun Sivíl (SEPS) prepara ona materiál konstrusaun atu disponibiliza, iha semana oin, ba vítima inséndiu iha aldeia Buqui, suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA).
“Ita apoia ona ai-han, ita kontinua esforsu iha semana ne’e materiál konstrusaun sira to’o fatin atu [vítima] sira hadi’a fali sira-nia hela fatin, tanba materiál sira-ne’e ita prepara ona iha Dili”, governante ne’e dehan iha aldeia Buqui, ohin.
Nia informa katak materiál konstrusaun hirak-ne’e ho pakote ba uma ida nian hanesan metru, pregu, martelu, arame, zinku, simentu, besi baja, besi beton no vítima sira mós iha direitu hetan osan $1000 kada xefe família.
“Antes 28 Novembru, materiál sira tenke to’o ona Oé-Cusse, tanba daudaun ita tama ona tempu udan, entaun afeta ba komunidade sira-nia hela fatin. Tanba ne’e mak ita tenke aselera, osan sei iha prosesu, maibé materiál sira tenke to’o uluk”, nia salienta.
Notísia relevante: SEPS kontinua apoia nesesidade bázika ba vítima inséndiu iha Usitasa’e
Materiál konstrusaun sei haruka bá Oé-Cusse, liuhusi transporte marítima hafoin Autoridade Protesaun Sivíl (APC) Oé-Cusse kontinua transporta bá vítima sira iha suku atu semana oin bele fahe ba sira.
Xefe Aldeia Buqui, Simão Quelo, dehan daudaun ne’e família vítima sira sei hela provizoriamente ho viziñu sira no balun harii uma tali provizóriu.
“Governu kuandu mai beibeik haree, vítima sira sente kontente. Ami rona katak SEPS sei lori materiál konstrusaun bá vítima iha semana oin. Ida-ne’e ami agradese tanba Governu mós la haluha nia povu sira ne’ebé daudaun enfrenta hela dezastre”, nia dehan.
Notísia relevante: Ahi han mutuk uma 12 iha Usitasa’e-RAEOA
Jacarias Unu, nu’udar vítima inséndiu, triste tanba insidente ne’e halo nia lakon rikusoin no sasán iha uma laran, tanba la konsege salva, inklui animál balun.
“Ami lahatene ahi ne’e mai husi ne’ebé? De repente de’it uma sira ahi han, ami mós laiha tanba bá iha to’os. Bainhira ami halai mai, uma sira moos ona, sasán hanesan batar, hare, osan-tahan no osan-mutin la salva”, nia lamenta.
Notísia relevante: Autoridade sei fornese dokumentu ba vítima inséndiu Usitasa’e
Inséndiu ne’e akontese iha loron 13 pur volta tuku 17:30, ne’ebé rezulta ahi han mutuk uma 12 no halo membru família 48 lakon rezidénsia no inan-ferik ida hetan kanek.
Rekorde katak autoridade RAEOA liuhusi Asesór ba Asuntu Sosiál ho Autoridade Protesaun Sivíl (APC) no Krús Vermella Timor-Leste (CVTL) filiál Oé-Cusse no Programa Alimentár Mundiál apoia ona nesesidade bázika hanesan, foos, supermie, ikan lata, susubeen, biskuit, mina, kafé, masin-midar no ai-han seluk. Apoia mós sasán dapur nian hanesan bikan, kanuru, balde, lona, roupa, sabaun no seluk tan.
Jornalista: Abílio Elo Nini
Editora: Maria Auxiliadora
