DILI, 26 novembru 2024 (TATOLI)–Sekretariu Estadu Peska, Domingos dos Santos, relata Timor-Leste lakon ai-parapa hamutuk rihun lima iha area kosteira.
Tuir governante ne’e dehan, ai-parapa lakon barak iha área kosteira sira-ne’e tanba ema-nia asaun ne’ebé la responsável, tanba iha lagoa sira-ne’e la’ós moris de’it mak lafaek no ikan sira maibé iha ai-horis hanesan ai-parapa.
“Ita iha riku soin sira hanesan ai-parapa mós komesa mohu, tanba ita liman badaen sira hotu. Hosi 9.000 tun tiha ba 4.000,” Sekretáriu Estadu Peska ne’e relata iha nia diskursu nakait ho validasaun proposta ba konservasaun lagoa hitu (7) iha munisipiu haat organiza hosi Conservation International, iha Timor Plaza, Dili.
Governante ne’e konsidera, redusaun ba iha númeru ai-parapa ne’e hanesan degradasaun rekursu ne’ebé makaas la halimar tanba konsukuénsia husi ema sira laiha konsiénsia no laiha responsabilidade.
Governante ne’e hateten, degradasaun ba iha ai-parapa sira-ne’e mos konsekuénsia husi tempu udan ne’ebé bee tun hosi foho lolon.
“Bee hosi foho lolon sira (ho foer) mai taka tiha ai-parapa nia hun sira, entaun ai-parapa sira-nia abut labele xupa aihan, entaun sira tenke mate,” nia dehan.
Degradasaun ai-parapa akontese tanba iha foho lolon sira-ne’e akontese degradasaun ba ai-horis, tanba tesi husi liman badaen ema-nian, gosta estraga ai-horis iha foho lolon no bee mai ho velosidade makaas, tanba ne’e bee mai lori rai bokur sira ba hotu tasi, entaun foho sira komesa mukit ba bebeik.
Jornalista : Jesuína Xavier
Editór : Cancio Ximenes
