KI promove nafatin prémiu protesaun no direitu ba labarik iha 2025
DILI, 03 dezembru 2024 (TATOLI)–Prezidente Konsellu Imprensa (KI), Otleio Ote, hateten, Konsellu Imprensa hakarak promove nafatin prémiu protesaun no direitu ba labarik sira iha tinan 2025.
Loloos ne’e, nia dehan, prémiu ne’e atribui ona iha 2024 ba jornalista sira-ne’ebé hakerek konteúdu barak no reportajen kona-ba protesaun no direitu ba labarik, maibé tanba iha prosesu balun entre UNICEF ho Sekretáriu Estadu Komunikasaun Sosiál (SECOMS), tanba ne’e mak sei promove iha 2025.
“Ita halo esforsu oinsá fó prioridade ba asuntu labarik no feto. Ita hanoin atu ko’alia ho UNICEF atu promove prémiu ida ba asuntu kobertura,” Prezidente KI ne’e hateten iha nia diskursu iha formasaun ba jornalista rádiu komunidade ho tema mundansa klimátika, iha Fatuhada, tersa ne’e.
“Ita agradese ba UNICEF ne’ebé kolabora ho Sekretáriu Estadu Komunikasaun Sosiál no KI. Ita hein iha futuru,” nia dehan.
Tanba, nia dehan, meu konunikasaun sosiál ka mídia ne’e nia papel importante tebes atu promove direitu no protesaun ba labarik.
“Ba ita mídia oinsá mak ita halo kobertura no konteúdu mídia kona-ba direitu labarik no labarik feto sira. Ita mós tenke iha koñesimentu oinsá halo reportajen kona-ba kazu labarik sira-nian,” nia hateten.
Iha kada rádiu komunidade iha territóriu ne’e, sira iha ona programa “Labarik Nia Lian” ne’ebé hetan apoiu formasaun husi Fundu Nasaun Unida ba Dezenvolvimentu Labarik (UNICEF).
Nune’e, nia husu ba televizaun no jornál sira bele halo konteúdu ida importante ba direitu labarik, liuliu foti notísia ne’e bainhira iha ona kazu ka akontesimentu.
Prezidente KI mós husu ba estasaun mídia sira atu investe nia rekursu umanu ba asuntu iha protesaun no direitu ba labarik, tanba sira sempre iha mudansa ba área kobertura.
Jornalista : Jesuína Xavier
Editór : Cancio Ximenes
