DILI, 09 dezembru 2024 (TATOLI)–Komandante Administrasaun Finansa Komando Jerál Polisia Nasionál Timor-Leste (PNTL), Supeintendente Xefe Polísia, Natercia Eufrasia Martins, husu ba inan-aman tenke hadook labarik sira husi kualker forma violénsia ne’ebé akontese iha família no sosiedade.
“Ita-nia rai Timor presiza rekursu umanu kualifikadu. Ida-ne’e presiza investe iha ita-nia oan sira iha área hotu-hotu hanesan edukasaun, saúde no livre husi presaun psikolojiku atu sira bele konsentra iha prosesu dezenvolvimentu futuru,” superintendente xefe ne’e hato’o ba Agência Tatoli, iha kampaña loron 16 kampaña ativismu kontra violensia hasoru feto realiza liuhusi diálogu públiku ne’ebé realzia husi FOKUPERS no World Vision ho tema “Hamutuk ita prevene no hapara violénsia hasoru Feto hodi promove Igualdade Jéneru no asegura feto nia direitu humanu liuhusi empoderamentu ekonomia”, iha salaun Delta Nova, segunda ne’e.
Nia sujere ba inan-aman sira hotu atu kuidadu oan sira livre husi violénsia oioin atu sira hadi’a sira-nia loron aban sai jerasaun ida-ne’ebé lori benefisiu ba nia rai ida-ne’e.
“Inan-aman bainhira iha problema buka fatin ne’ebé labele besik oan sira para hahalok inan sira labele husik ba oan sira-nia prosesu dezenvolvimentu ba futuru, tanba sira mak ita-nia jerasaun ba dezenvolvimentu, matenek no peritu futuru nian mak sira-ne’e,” nia apela.
Superintendente ne’e relata, husi janeiru to’o inisiu fulan=desembru ne’e, PNTL rejista krime violénsia bazeia ba jéneru 1.000-resin.
Nia hateten, husi totál kazu ne’ebé PNTL rejista, maiória kazu mak violénsia doméstika iha família hamutuk 800.
“Ita-nia dadus rejistu kazu liu mil no aas liu mak violénsia doméstika,” nia dehan.
Tuir nia, maske PNTL serbisu hamutuk ona Governu halo kampaña sensibilizasaun ba ema hotu liuhusi forma oioin maibé kazu kontinua rejista makaas.
Jornalista : Jesuína Xavier
Editór : Cancio Ximenes
