Prevensaun violénsia hasoru feto-labarik feto papel ema hotu nian
DILI, 09 dezembru 2024 (TATOLI)–Sekretária Estadu Igualdade no Inkluzaun (SEII), Elvina de Sousa Carvalho, hateten prevensaun violénsia hasoru feto no labarik feto ne’e papel ema hotu nian hodi kombate no redús violénsia sira-ne’e.
Goveranante ne’e husu ba instituisaun Estadu no privadu sira atu promove direitu feto no labarik feto iha servisu fatin hodi evita hamosu violénsia.
“Esforsu ba halakon no hamenus kualker tipu violénsia hasoru feto no labarik feto la’ós esforsu ema ida-nian maibé esforsu ita hotu nian, insituisaun Estadu nian, sosiedade sivil no ema hotu nia esforsu no kolaborasaun,” Sekretária Estadu ne’e hato’o iha atividade “Loron 16 kampaña ativismu kontra violensia hasoru feto no labarik feto” ne’ebé realiza diálogu públiku husi FOKUPERS no World Vision ho tema “Hamutuk ita prevene no hapara violénsia hasoru Feto hodi promove Igualdade Jéneru no asegura feto nia direitu humanu liuhusi empoderamentu ekonomia”.
Objetivu husi atividade ida-ne’e atu hasa’e konsiênsia publiku hodi hapara violénsia hasoru feto no asegura kompromisiu Estadu ba alokasaun orsamentu nomós politika ne’ebé sensível ba jéneru liuhusi empoderamentu ekonomia feto Timor-Leste.
Tuir nia, responsabilidade ema hotu nia bele hamenus violensia hasoru feto no labarik feto, ema ho fesiensia no LGTBQ hodi bele iha respita mutua, sai sosiedade igual no iha inkluzividade.
FOKUPERS: foinsa’e tenke sai autór ba promosaun igualdade jéneru
Diretora Ezekutivu FOKUPERS, Domingas Amaral, hateten foinsa’e tenke sai autór ba promosaun no prevensau igualdade jéneru iha Timor-Leste.
“Ita bolu joven no foinsa’e sira hosi munisipiu Dili, atu hola perte iha eventu ida ne’e nune’e sira hotuhotu bele sai autor prinsipal iha luta hapara violensia hasoru feto no labarik feto liuhosi enpoderamentu ekonomia feto,” dirijente ne’e hateten.
Nia esplika, iha dialogu ne’e atu promove oinsá feto partisipa iha atividade enpoderamentu ekonomia, tanba liuhosi atividade sira-ne’e bele kontribui ba iha dezenvolvimentu nasionál, liuliu kontribui ba iha bein estar família nian hanesan oan sira bele ba eskola liuhusi rendimentu.
FOKUPERS kontinua halo esforsu liuhusi sensivilizasaun no prevensaun hodi muda ema-nia atitude no hanoin kona-ba asuntu igualdade jéneru.
“Maske ida-ne’e la fasil maibé ita fiar katak ho partisipasaun másimu juventude no komunidade iha loron ida Timor-Leste bele livre husi violensia no moris iha dame iha ita nia rai laran,” nia dehan.
FOKUPERS rejista kazu violénsia hasoru feto no labarik feto husi janeiru to’o setembru hamutuk 280 ne’ebé agresaun fíziku.
FOKUPERS mós akompaña violénsia bazeia ba jéneru ne’ebé akomoda labarik sira-ne’ebé mai ho inan-aman sira ba iha uma mahon hamutuk 80.
Jornalista : Jesuína Xavier
Editór : Cancio Ximenes
