DILI, 10 dezembru 2024 (TATOLI) –Horseik mosu dezintendimentu ida iha arredór Parlamentu Nasionál (PN), entre deputadu na’in rua; ida husi Bankada governu no ida opozisaun, ikusmai sai ‘virál’ mós iha rede sosiál Facebook.
Ho nune’e, Prezidente Repúblika (PR), José Ramos Horta, hateten, deputadu sira ne’ebé mak iha PN hatudu atitude brutalizmu sei fó ezemplu ladi’ak ba mundu. No, husu atu buka solusaun ho ulun-malirin.
“Impaktu negativu liu-liu ba sira rasik, sei impaktu ba sira-nia partidu,” Prezidente Repúblika José Ramos Horta hatete ba Jornalista bainhira ramata entrega Prémiu Direitus Umanus Sergio Vieira de Mello Edisaun 17 ba vensedór na’in-lima, iha Palásiu Prezidensiál, tersa ne’e.
PR Horta hatutan, povu iha Timor-Leste no iha mundu trauma ho violénsia. Povu hakarak rona líder partidu ne’ebé hatudu matenek, hatene ko’alia ho kalma ho kle’an buka solusaun iha Parlamentu, Governu aprezenta lei ruma, aprezenta orsamentu buka kolabora ko’alia didi’ak, hanesan iha 2013, Mari Alkatiri fó orden ba bankada para kolabora ho Governu orsamentu liu unaminidade depois momentu ne’ebá sira kolabora di’ak loos ne’e mak Xanana, atuál Primeiru-ministru, tau Doutor Mari iha Oé-cusse.
Notísia relevante:PPN konsidera PR nia inisiativa rekonsialiasaun nu’udar papél husi premiadu Nobel da Pás
Horta mós ko’alia ba líder partidu polítiku sira atu fó instrusaun ba membru iha Parlamentu Nasionál ko’alia ho kalma, respeitu, hatudu debate ho kakutak-malirin.
Prezidente Repúblika, José Ramos Horta konsidera, atitude deputadu sira ne’ebé hamosu dezintendimentu, hanesan horseik ne’e ne’e la reprezenta povu, tanba povu Timor sivilizadu loos haree husi Amo Papa nia vizita; povu, joven sira hatudu sira-nia sivilizadu. Deputadu sira la reprezenta. Nune’e husu povu lalika vota ba sira.
“Iha eleisaun mai kuidadu ho sira ne’ebé mak ko’alia makaas sabraut sira ne’e, karik PR mak iha influénsia ruma karik sei tuun hatete ba povu katak hakarak rai ne’e ba oin labele vota ba sira ne’ebá,” Xefe Estadu afirma.
Notísia relevante:Rekonsiliasaun nasionál: Xanana líder vizionáriu no husu timoroan haluha pasadu
Jornalista: Osória Marques
Editór: Rafael Ximenes de A. Belo
