DILI, 19 Dezembru 2024 (TATOLI) – Uma-kain hamutuk 1.013 iha suku Guguleur no Vatuvou, iha postu administrativu Maubara, munisípiu Liquiçá, seidauk asesu liña eletrisidade, informa Administradór Postu Maubara, Alcino da Cruz.
Nia relata katak husi husi totál família ne’e, 637 mai husi suku Guguleur no 376 husi suku Vatuvou. Tanba ne’e, nia garante katak suku rua ne’e tama ona ba iha lista hodi dada eletrisidade ba populasaun.
“Tinan oin, ita sei dada ahi ba populasaun iha suku Vaubou no Guguleur. Iha suku sira ne’e mós sei harii sala saúde ida no konstrui estrada iha suku sira ne’e”, administradór hato’o iha Comoro, ohin.
Postu Administrativu Maubara iha suku Vatuvou, Maubaralisa, Vaviquinia, Guguleur, Quiço, Liçadila ho total populasaun 26.996.
Jornalista: Jesuína Xavier
Editór: Cancio Ximenes
