OÉ-CUSSE, 10 Janeiru 2025 (TATOLI) – Eletrisidade Timor-Leste (EDTL) Rejiaun Administrativa Espesiál Oé-Cusse Ambeno (RAEOA) rekolla, iha tinan kotuk, reseita hamutuk $504.984,37 ba kofre Estadu.
“Reseita ida-ne’e mai husi vende enerjia ne’ebé ita-nia kliente hola pulsa, tipu kontadór konvensionál, terseiru mak ligasaun foun ba sidadaun ne’ebé hakarak dada liña eletrisidade”, Xefe Departamentu EDTL Oé-Cusse, Antão Cabal, dehan iha Oé-Cusse, ohin.
Nia informa katak, durante ne’e, EDTL instala ona kontadór prepagu 15.238, maioria iha sub-rejiaun Pante Makasar, maibé iha ona planu ba oin atu halo instalasaun mós ba iha sub-rejiaun Oésilo, Pássabe no Nítibe, nune’e bele kontribui reseita ba Estadu.
“Reseita ne’e la inklui sansaun ka dada ahi ilegál, tanba durante ne’e ita seidauk deteta sidadaun ruma prátika dada ahi ilegál atu selu multa. Agora 2025, ita esforsu atu monta kontadór ba kliente ne’ebé seidauk instala”, nia dehan.
Notísia relevante: Dezde 2015, EDTL Oe-Cusse hatama reseita millaun $1-resin
Kliente EDTL Vicente Ulan rekomenda ba parte EDTL atu hadi’a sistema no atendimentu, tanba durante ne’e sistema monu ahi mate to’o loron rua ka tolu no afeta ba ai-han balun estraga.
“Ami rekomenda hadi’a atedimentu no sistema, tanba dalaruma presiza urjente tanba ahi mate, maibé ami mai to’o edifísiu tuku 16:00 sei hein to’o fali tuku 19:00 mak foin loke atu hola pulsa. Depois sistema monu tan, entaun ne’e afeta ba buat barak, liuliu fa’an sasán iha jeleira dalaruma estraga, tanba sistema monu no atendimentu tarde”, nia dehan.
Notísia relevante: Trimestre datolu, EDTL Oé-Cusse kontribui rihun $80-resin ba kofre Estadu
Tuir dokumentu ne’ebé Tatoli asesu, EDTL Oé-Cusse arrekada reseita, entre 2015 to’o 2023, hamutuk millaun $1.896.585,02.
Totál funsionáriu ne’ebé presta serbisu iha Departamentu Eletrisidade Oé-Cusse hamutuk na’in-63.
Jornalista: Abílio Elo Nini
Editora: Maria Auxiliadora