DILI, 10 janeiru 2025 (TATOLI)—Komisaun D trata asuntu Ekonomia no Dezenvolvimentu iha Parlamentu Nasionál (PN), tau ona ajenda no sei bolu Sekretária Estadu Formasaun Profisionál no Empregu (SEFOPE), hodi bele halo diskusaun kona-ba prosesu atu altera lei Traballu númeru 4/2012, loron 21 fulan-fevereru, hodi hadi’a saláriu mínimu ba traballadór sira.
Notísia Relevante: Komisaun D iha PN kontinua husu Governu altera lei saláriu mínimu
“Ne’e tama ona ami-nia kalendáriu atu bolu SEFOPE mai, husu sira-nia preparasaun no lei ne’e sira dudu ba to’o ona ne’ebé, hodi responde ba ita-nia traballadór sira-nia preokupasaun,” Prezidente Komisaun D, Ricardo Baptista, hateten iha resintu PN.
Membru husi órgaun lejislativa ne’e husu atu SEFOPE haree ona lei saláriu mínimu, no hein tinan ida-ne’e bele rezolve ona saláriu mínimu tanba saláriu mínimu la responde ona situasaun atuál.
“Husu nafatin SEFOPE atu haree ida-ne’e. Governu liuhusi SEFOPE iha padraun rasik ba hasa’e saláru mínimu. Nune’e, teknikamente sira mak hatene maibé politikamente ba traballadór hotu inklui PN hakarak iha saláriu ne’ebé mak sufisiente ba ita-nia traballadór sira hotu,” nia hateten.
Antes ne’e, Sekretáriu Estadu SEFOPE, Rogerio Mendonça, hateten nafatin fó prioridade ba alterasaun lei saláriu mínimu iha tinan 2025.
Notísia Relevante: KSTL lamenta Governu seidauk aprova saláriu minimu ba traballador sira
Tanba ne’e, nia dehan, iha Orsamentu Jerál Estadu (OJE) 2025 ba SEFOPE liuhusi programa funsionamentu no dezenvolvimentu ne’e prevee osan ho orsamentu hodi haree ba lejislasaun sira hanesan alterasaun lei traballu, lei kontra asedu mundu iha traballu ne’ebé prepara hela atu submete mai Konsellu Ministru.
“Iha Governu Konstitusionál da-ualu (VIII) la halo alterasaun dekretu-lei saláriu mínimu. Iha Governu Konstitusionál da-sia (IX) lori duni mai Konsellu Ministru maibé parte husi parte Ministériu asuntu Kombatente Veteranu hato’o pontu balun. Se ita aprova lei saláriu mínimu, nia afeta kedas ba kustu isentivu no saláriu mininu ita la kontrola presu sasán iha merkadu bele presu sa’e, ida-ne’e ami lori no aprezenta ona iha konsellu ministru,” nia hateten.
Tanba ne’e, iha tinan 2025 ne’e, SEFOPE sei fó prioridade hodi haree no tetu atu altera lei saláriu mínimu ne’e.
Aleinde ne’e, SEFOPE mós haree lejislasaun ba dekretu konsellu arbitrazen ne’ebé presiza diploma ministerial ne’ebé pontu balun presiza revizaun, konvensaun organizasaun traballu liuliu idade mínimu liuliu labarik sira idade minoria faan sasán iha dalan ninin ne’e persiza altera lei garante proteje labarik sira.
Notísia Relevante: SEFOPE promete altera lei saláriu mínimu iha 2025
Jornalista : Nelson de Sousa
Editór : Cancio Ximenes