DILI, 22 Janeiru 2025 (TATOLI) – Konstrusaun ba Institutu Nasionál Linguistíka (INL) iha Universidade Nasionál Timor Lorosa’e (UNTL) foin mak atinje 32%, maske durasaun ba konstrusaun ne’e tinan ida de’it maibé la konklui tuir kontratu ne’ebé determinadu, tanba ne’e, sei estende tan ba tinan ida.
Rekorda fali katak obra ida-ne’e lansa fatuk dahuluk iha 5 janeiru no konstrusaun akontese entre janeiru 2024 to’o janeiru 2025. Empreza Venture Feto Kaduak no Dwipongo Bee Feto Tata mak kaer projetu ne’e.
Notísia relevante : Konstrusaun edifísiu INL sei gasta rihun $700-resin
“Konstrusaun atinje 32%, ne’e haree husi fundasaun to’o iha sinta leten ne’e. Bainhira sira chor ona mak foin define tan nia progresu. Ne’ebé bainhira to’o fulan-Jullu mak sira seidauk remata, UNTL sei foti asaun no fó sansaun pena multa ba kompañia, maibé ida-ne’e sei deside husi aprovizionamentu ninia ne’ebé bele mós multa no bele mós estende, depende razaun ne’ebé kompañia sira hato’o”, Jestór Projetu iha UNTL, Fernao Soares Reis, hatete iha nia knaar fatin, UNTL Sentrál, kuarta ne’e.
Reis esplika, projetu ida-ne’e tarde no iha estensaun tinan ida maibé bele lalais to’o fulan-Jullu de’it. Buat balun tarde tanba mobilizasaun materiál no ema sira servisu iha terrenu ne’e troka malu hela de’it.
“Mobilizasaun materiál iha terrenu ne’e mós tarde tanba ninia ema sira servisu ne’e mós troka malu hela de’it, entaun prezudika servisu ne’e la’o tarde loos. Projetu referidu halo fali estensaun to’o jullu”, nia dehan.
Alokasaun orsamentu ba obra referida hamutuk rihun $768 maibé UNTL aloka uluk ona 20% ba empreza join venture hodi halo kompra materiál konstrusaun.
“Ita fó uluk 20% ba kompañia ne’e, nune’e kompra materiál konstrusaun nian, 20% ne’e ekivale ba osan hamutuk rihun $160-resin”, nia relata.
Reitór ba asuntu Dezenvolvimentu Institusionál iha UNTL, Lelis Gonzaga Fraga, husu atu aselera tanba konstrusaun fízika foin mak atinje 32%, ida-ne’e kleur liu.
“Konstrusaun INL ne’ebé konstrui iha Liceu ne’ebá ne’e kaer hosi Join Venture Feto Kaduak no Dwipongo Bee Feto Tata ne’e no to’o ohin loron foin mak 32%. Tanba rezultadu ne’ebé ita haree no hatudu iha terenu katak materiál menus no traballadór mós menus tanba ne’e mak tarde maibé ita husu atu aselera nune’e bele finaliza”, Pro-Reitór rekomenda.
Pro-Reitór dehan UNTL halo ona pagamentu 20%, nune’e empreza tenke toma atensaun no aselera hodi finaliza lalais obra fererida. Tanba tuir loloos ne’e obra ida-ne’e tenke finaliza iha fim do ano.
Tezoreiru Projetu QHSE, PT. Dwiponggo Seto Bee Feto Kaduak, PT. Tata Raya Kharisma (JV), Viodea Ramadhaniar, informa materiál konstrusaun tama tarde tanba importa hotu husi Indonézia.
Notísia relevante : Konstrusaun edifísiu foun INL iha UNTL foin atinje 24%
Projetu konstrusaun edifísiu foun INL iha UNTL atinje 22%
Jornalista: Osória Marques
Editór : Zezito Silva